Phassasamudayāti sampayuttaphassapaccayā .
Vedanāsamosaraṇāti tisso vedanā samosaraṇā .
Samādhippamukhātiādayo pana apacayapakkhikāti veditabbā .Tattha
V3.264 pubbaṅgamaṭṭhena jeṭṭhakaṭṭhena vā samādhi pamukhaṃ etesanti samādhippamukhā .Satādhipateyyāti jeṭṭhakakaraṇaṭṭhena sati adhipateyyaṃ etesanti satādhipateyyā adhipati eva adhipateyyanti katvā , catūsu satipaṭṭhānesu suppatiṭṭhitacittā kāyānupassanādimukhena samathavipassanābhāvanānuyuttāti attho .Tathābhāvassa cāyaṃ upāyo , yaṃ satādhipateyyā viharatha , satipaṭṭhānabhāvanāya yuttappayuttā hotha , sabbattha vā satārakkhena cetasā viharathāti evamettha attho veditabbo .