Taṃ kiṃ maññatha , bhikkhaveti idaṃ kasmā āraddhaṃ ?Ettakena ṭhānena anattalakkhaṇameva kathitaṃ , na aniccadukkhalakkhaṇāni , idāni tāni dassetvā samodhānetvā tīṇipi lakkhaṇāni dassetuṃ idamāraddhanti veditabbaṃ .
Tasmāti yasmā ime pañcakkhandhā aniccā dukkhā anattā , tasmā .Yaṃkiñci rūpan tiādīsu vitthārakathā
V2.247 visuddhimagge paññābhāvanādhikāre khandhaniddese vuttāva .Sesaṃ sabbattha vuttānusāreneva veditabbaṃ .Imasmiṃ pana sutte anattalakkhaṇameva kathitanti .Sattamaṃ . 23. Sutavāti āgamādhigamasaṅkhātena bāhusaccena samannāgatattā sutavā .Nibbindatīti ukkaṇṭhati .
Ettha ca nibbidāti vuṭṭhānagāminīvipassanā adhippetā .Nibbindaṃ virajjatīti ettha virāgavasena cattāro maggā kathitā .
Virāgā vimuccatīti virāgena maggeneva hetubhūtena paṭippassaddhivimuttivasena vimuccati .Iminā cattāri sāmaññaphalāni kathitāni .
Vimuttasmiṃ vimuttamiti ñāṇaṃ hotīti iminā pana paccavekkhaṇañāṇaṃ kathitaṃ .
Khīṇā jātītiādīhi tassa bhūmi .Tena hi ñāṇena ariyasāvako paccavekkhanto ‘‘ khīṇā jātī ’’ tiādīni pajānāti .Katamā panassa jāti khīṇā , kathañca naṃ pajānātīti ?Na tāvassa atītā jāti khīṇā pubbeva khīṇattā , na anāgatā anāgate vāyāmābhāvato , na paccuppannā .Yā pana maggassa abhāvitattā uppajjeyya ekacatupañcavokārabhavesu ekacatupañcakkhandhappabhedā jāti , sā maggassa bhāvitattā anuppādadhammataṃ
M3.190 āpajjanena khīṇā , taṃ so maggabhāvanāya pahīnakileseV3.174 paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto pajānāti .