68. Catutthe suttageyyādidhammaṃ jānātīti dhammaññū .
Tassa tasseva suttageyyādinā bhāsitassa tadaññassa suttapadatthassa bodhakassa saddassa atthakusalatāvasena atthaṃ jānātīti atthaññū .
‘‘ Ettakomhi sīlena samādhinā paññāyā ’’ ti evaṃ yathā attano pamāṇajānanavasena attānaṃ jānātīti attaññū .
Paṭiggahaṇaparibhogapariyesanavissajjanesu mattaṃ jānātīti mattaññū .Niddese pana paṭiggahaṇamattaññutāya eva paribhogādimattaññutā pabodhitā hotīti paṭiggahaṇamattaññutāva dassitā .
68. Catutthe kālaṃ jānātīti yuttappattakālaṃ jānāti .
Ayaṃ kālo uddesassāti ayaṃ buddhavacanaṃ uggaṇhanakālo .Paripucchāyāti atthānatthaṃ kāraṇākāraṇaṃ paripucchāya .Yogassāti yoge kammaṃ pakkhipanassa .Paṭisallānassāti nilīyanassa ekībhāvassa .
‘‘ Ayaṃ kālo uddesassa , ayaṃ kālo paripucchāya , ayaṃ kālo yogassa adhigamāyā ’’ ti evaṃ kālaṃ jānātīti kālaññū .Tattha pañca vassāni uddesassa kālo , dasa paripucchāya , idaṃ atisambādhaṃ , atikkhapaññassa tāvatā kālena tīretuṃ asakkuṇeyyattā
V3.178 dasa vassāni uddesassa kālo , vīsati paripucchāya , tato paraṃ yoge kammaṃ kātabbaṃ .Khattiyaparisādikaṃ
M3.192 aṭṭhavidhaṃ parisaṃ jānātīti parisaññū .Bhikkhuparisādikaṃ catubbidhaṃ , khattiyaparisādikaṃ manussaparisaṃyeva puna catubbidhaṃ gahetvā aṭṭhavidhaṃ vadanti apare .Niddese panassa khattiyaparisādicatubbidhaparisaggahaṇaṃ nidassanamattaṃ daṭṭhabbaṃ .Dhammānudhammappaṭipannoti navannaṃ lokuttaradhammānaṃ anurūpadhammaṃ pubbabhāgapaṭipadaṃ paṭipanno .
Evaṃ kho , bhikkhave , bhikkhu puggalaparoparaññū hotīti evaṃ
P4.58 bhikkhu puggalānaṃ paroparaṃ tikkhamudubhāvaṃ jānanasamattho nāma hoti .‘‘ Imaṃ me sevantassa akusalā dhammā parihāyanti , kusalā dhammā abhivaḍḍhanti , tasmā ayaṃ puggalo sevitabbo , vipariyāyato añño asevitabbo ’’ ti sevitabbāsevitabbapuggalaṃ jānātīti puggalaparoparaññū .Evañhi tesaṃ puggalānaṃ paroparaṃ ukkaṭṭhanihīnataṃ jānāti nāma .Niddesepissa sevitabbāsevitabbapuggale vibhāvanameva samaṇakathākatanti daṭṭhabbaṃ .