8. Nidhikaṇḍasuttaṃ
1.
Nidhiṃ
P0.7 nidheti puriso , gambhīre odakantike ;Atthe kicce samuppanne , atthāya me bhavissati .
2.
Rājato vā duruttassa , corato pīḷitassa vā ;
Iṇassa vā pamokkhāya , dubbhikkhe āpadāsu vā ;
Etadatthāya lokasmiṃ , nidhi nāma nidhīyati .
3.
Tāvassunihito [ tāva sunihito ( sī .)] santo , gambhīre odakantike ;
Na sabbo sabbadā eva , tassa taṃ upakappati .
4.
Nidhi vā ṭhānā cavati , saññā vāssa vimuyhati ;
Nāgā vā apanāmenti , yakkhā vāpi haranti naṃ .
5.
Appiyā
V0.10 vāpi dāyādā , uddharanti apassato ;Yadā puññakkhayo hoti , sabbametaṃ vinassati .
6.
Yassa
T0.12 dānena sīlena , saṃyamena damena ca ;Nidhī sunihito hoti , itthiyā purisassa vā .
7.
Cetiyamhi
M0.10 ca saṅghe vā , puggale atithīsu vā ;Mātari pitari cāpi [ vāpi ( syā . kaṃ .)], atho jeṭṭhamhi bhātari .
8.
Eso nidhi sunihito , ajeyyo anugāmiko ;
Pahāya gamanīyesu , etaṃ ādāya gacchati .
9.
Asādhāraṇamaññesaṃ , acorāharaṇo nidhi ;
Kayirātha dhīro puññāni , yo nidhi anugāmiko .
10.
Esa devamanussānaṃ , sabbakāmadado nidhi ;
Yaṃ yadevābhipatthenti , sabbametena labbhati .
11.
Suvaṇṇatā susaratā , susaṇṭhānā surūpatā [ susaṇṭhānasurūpatā ( sī .), susaṇṭhānaṃ surūpatā ( syā . kaṃ .)];
Ādhipaccaparivāro , sabbametena labbhati .
12.
Padesarajjaṃ issariyaṃ , cakkavattisukhaṃ piyaṃ ;
Devarajjampi dibbesu , sabbametena labbhati .
13.
Mānussikā ca sampatti , devaloke ca yā rati ;
Yā ca nibbānasampatti , sabbametena labbhati .
14.
Mittasampadamāgamma , yonisova [ yoniso ve ( sī .), yoniso ce ( syā .), yoniso ca (?)] payuñjato ;
Vijjā vimutti vasībhāvo , sabbametena labbhati .
15.
Paṭisambhidā
V0.11 vimokkhā ca , yā ca sāvakapāramī ;Paccekabodhi buddhabhūmi , sabbametena labbhati .
16.
Evaṃ
T0.13 mahatthikā esā , yadidaṃ puññasampadā ;Tasmā dhīrā pasaṃsanti , paṇḍitā katapuññatanti .
Nidhikaṇḍasuttaṃ niṭṭhitaṃ .