5. Maṅgalasuttaṃ

1. EvaṃV0.4 me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme .

Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ aṭṭhāsi .

Ekamantaṃ ṭhitā kho sā devatā bhagavantaṃ gāthāya ajjhabhāsi –

‘‘ BahūP0.3 devā manussā ca , maṅgalāni acintayuṃ ;

Ākaṅkhamānā sotthānaṃ , brūhi maṅgalamuttamaṃ ’’.

‘‘ Asevanā ca bālānaṃ , paṇḍitānañca sevanā ;

Pūjā ca pūjaneyyānaṃ [ pūjanīyānaṃ ( sī . syā . kaṃ . pī .)], etaṃ maṅgalamuttamaṃ .

‘‘ PatirūpadesavāsoM0.4 ca , pubbe ca katapuññatā ;

AttasammāpaṇidhiT0.4 [ atthasammāpaṇīdhī ( katthaci )] ca , etaṃ maṅgalamuttamaṃ .

‘‘ Bāhusaccañca sippañca , vinayo ca susikkhito ;

Subhāsitā ca yā vācā , etaṃ maṅgalamuttamaṃ .

‘‘ Mātāpitu upaṭṭhānaṃ , puttadārassa saṅgaho ;

Anākulā ca kammantā , etaṃ maṅgalamuttamaṃ .

‘‘ Dānañca dhammacariyā ca , ñātakānañca saṅgaho ;

Anavajjāni kammāni , etaṃ maṅgalamuttamaṃ .

‘‘ Āratī viratī pāpā , majjapānā ca saṃyamo ;

Appamādo ca dhammesu , etaṃ maṅgalamuttamaṃ .

‘‘ GāravoV0.5 ca nivāto ca , santuṭṭhi ca kataññutā ;

Kālena dhammassavanaṃ [ dhammassāvaṇaṃ ( ka . sī .), dhammasavanaṃ ( ka . sī .)], etaṃ maṅgalamuttamaṃ .

10.

‘‘ Khantī ca sovacassatā , samaṇānañca dassanaṃ ;

Kālena dhammasākacchā , etaṃ maṅgalamuttamaṃ .

11.

‘‘ Tapo ca brahmacariyañca , ariyasaccāna dassanaṃ ;

Nibbānasacchikiriyā ca , etaṃ maṅgalamuttamaṃ .

12.

‘‘ Phuṭṭhassa lokadhammehi , cittaṃ yassa na kampati ;

Asokaṃ virajaṃ khemaṃ , etaṃ maṅgalamuttamaṃ .

13.

‘‘ Etādisāni katvāna , sabbatthamaparājitā ;

Sabbattha sotthiṃ gacchanti , taṃ tesaṃ maṅgalamuttaman ’’ ti .

Maṅgalasuttaṃ niṭṭhitaṃ .