5. Brahmayācanakathā

Author： _System_Pali_VRI_ @ Administrator

5. Brahmayācanakathā

7.[ ayaṃ brahmayācanakathā dī . ni .2.64 ādayo ; ma . ni .1.281 ādayo ; ma . ni .2.336 ādayo ; saṃ . ni .1.172 ādayo ] Atha kho bhagavā sattāhassa accayena tamhā samādhimhā vuṭṭhahitvā rājāyatanamūlā yena ajapālanigrodho tenupasaṅkami .

Tatra sudaṃ bhagavā ajapālanigrodhamūle viharati .

Atha kho bhagavato rahogatassa paṭisallīnassa evaṃ cetaso parivitakko udapādi –

‘‘ adhigato kho myāyaṃ dhammo gambhīro duddaso duranubodho santo paṇīto atakkāvacaro nipuṇo paṇḍitavedanīyo .

Ālayarāmā kho panāyaṃ pajā ālayaratā ālayasammuditā .

Ālayarāmāya kho pana pajāya ālayaratāya ālayasammuditāya duddasaṃ idaṃ ṭhānaṃP1.5 yadidaṃ idappaccayatāpaaccasamuppādo ;

idampi kho ṭhānaṃ sududdasaṃ yadidaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṃ .

Ahañceva kho pana dhammaṃ deseyyaṃ , pare ca me na ājāneyyuṃ , so mamassa kilamatho , sā mamassa vihesā ’’ ti .

Apissu bhagavantaṃ imā anacchariyā gāthāyo paṭibhaṃsu pubbe assutapubbā –

‘‘ KicchenaT1.9 me adhigataṃ , halaṃ dāni pakāsituṃ ;

Rāgadosaparetehi , nāyaṃ dhammo susambudho .

‘‘ PaṭisotagāmiṃM0.6 nipuṇaṃ , gambhīraṃ duddasaṃ aṇuṃ ;

Rāgarattā na dakkhanti , tamokhandhena āvuṭā [ āvaṭā ( sī .)]’’ti .

ItihaV0.6 bhagavato paṭisañcikkhato appossukkatāya cittaṃ namati , no dhammadesanāya .

8. Atha kho brahmuno sahampatissa bhagavato cetasā cetoparivitakkamaññāya etadahosi –

‘‘ nassati vata bho loko , vinassati vata bho loko , yatra hi nāma tathāgatassa arahato sammāsambuddhassa appossukkatāya cittaṃ namati [ namissati (?)], no dhammadesanāyā ’’ ti .

Atha kho brahmā sahampati – seyyathāpi nāma balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya evameva – brahmaloke antarahito bhagavato purato pāturahosi .

Atha kho brahmā sahampati ekaṃsaṃ uttarāsaṅgaṃ karitvā dakkhiṇajāṇumaṇḍalaṃ pathaviyaṃ nihantvā yena bhagavā tenañjaliṃ paṇāmetvā bhagavantaṃ etadavoca –

‘‘ desetu , bhante , bhagavā dhammaṃ , desetu sugato dhammaṃ .

Santi sattā apparajakkhajātikā , assavanatā dhammassa parihāyantiT1.10 , bhavissanti dhammassa aññātāro ’’ ti .

Idamavoca brahmā sahampati , idaṃ vatvāna athāparaṃ etadavoca –

‘‘ Pāturahosi magadhesu pubbe ;

Dhammo asuddho samalehi cintito ;

Apāpuretaṃ [ avāpuretaṃ ( sī .)] amatassa dvāraṃ ;

Suṇantu dhammaṃ vimalenānubuddhaṃ .

‘‘ Sele yathā pabbatamuddhaniṭṭhito ;

Yathāpi passe janataṃ samantato ;

Tathūpamaṃ dhammamayaṃ sumedha ;

Pāsādamāruyha samantacakkhu ;

SokāvatiṇṇaṃP1.6 janatamapetasoko ;

Avekkhassu jātijarābhibhūtaṃ .

‘‘ UṭṭhehiM0.7 vīra vijitasaṅgāma ;

Satthavāha aṇaṇa [ anaṇa ( ka .)] vicara loke ;

Desassu [ desetu ( ka .)] bhagavā dhammaṃ ;

Aññātāro bhavissantī ’’ ti .

[[] sī .

syā .

potthakesu natthi , mūlapaṇṇāsakesu pāsarāsisutthe brahmayācanā sakiṃ yeva āgatā ][ EvaṃV0.7 vutte bhagavā brahmānaṃ sahampatiṃ etadavoca –

‘‘ mayhampi kho , brahme , etadahosi –

‘ adhigato kho myāyaṃ dhammo gambhīro duddaso duranubodho santo paṇīto atakkāvacaro nipuṇo paṇḍitavedanīyo .

Ālayarāmā kho panāyaṃ pajā ālayaratā ālayasammuditā .

Ālayarāmāya kho pana pajāya ālayaratāya ālayasammuditāya duddasaṃ idaṃ ṭhānaṃ yadidaṃ idappaccayatāpaṭiccasamuppādo ;

idampi kho ṭhānaṃ sududdasaṃ yadidaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṃ .

Ahañceva kho pana dhammaṃ deseyyaṃ , pare ca me na ājāneyyuṃ , so mamassa kilamatho , sā mamassa vihesā ’ ti .

Apissu maṃ , brahme , imā anacchariyā gāthāyo paṭibhaṃsu pubbe assutapubbā –

‘ Kicchena me adhigataṃ , halaṃ dāni pakāsituṃ ;

Rāgadosaparetehi , nāyaṃ dhammo susambudho .

‘ Paṭisotagāmiṃ nipuṇaṃ , gambhīraṃ duddasaṃ aṇuṃ ;

Rāgarattā na dakkhanti , tamokhandhena āvuṭā ’ ti .

Itiha me , brahme , paṭisañcikkhato appossukkatāya cittaṃ namati no dhammadesanāyā ’’ ti .

Dutiyampi kho brahmā sahampati bhagavantaṃ etadavoca –

‘‘ desetu , bhante , bhagavā dhammaṃ , desetu sugato dhammaṃ ;

santi sattā apparajakkhajātikā , assavanatā dhammassa parihāyanti , bhavissanti dhammassa aññātāro ’’ ti .

Idamavoca brahmā sahampati , idaṃ vatvāna athāparaṃ etadavoca –

‘‘ PāturahosiM0.8 magadhesu pubbe ;

Dhammo asuddho samalehi cintito ;

Apāpuretaṃ amatassa dvāraṃ ;

Suṇantu dhammaṃ vimalenānubuddhaṃ .

‘‘ Sele yathā pabbatamuddhaniṭṭhito ;

Yathāpi passe janataṃ samantato ;

TathūpamaṃV0.8 dhammamayaṃ sumedha ;

Pāsādamāruyha samantacakkhu ;

Sokāvatiṇṇaṃ janatamapetasoko ;

Avekkhassu jātijarābhibhūtaṃ .

‘‘ Uṭṭhehi vīra vijitasaṅgāma ;

Satthavāha aṇaṇa vicara loke ;

Desassu bhagavā dhammaṃ ;

Aññātāro bhavissantī ’’ ti .

Dutiyampi kho bhagavā brahmānaṃ sahampatiṃ etadavoca –

‘‘ mayhampi kho , brahme , etadahosi –

‘ adhigato kho myāyaṃ dhammo gambhīro duddaso duranubodho santo paṇīto atakkāvacaro nipuṇo paṇḍitavedanīyo .

Ālayarāmā kho panāyaṃ pajā ālayaratā ālayasammuditā .

Ālayarāmāya kho pana pajāya ālayaratāya ālayasammuditāya duddasaṃ idaṃ ṭhānaṃ yadidaṃ idappaccayatāpaṭiccasamuppādo ;

idampi kho ṭhānaṃ sududdasaṃ yadidaṃ sabbasaṅkhārasamatho sabbūpadhipaṭinissaggo taṇhākkhayo virāgo nirodho nibbānaṃ .

Ahañceva kho pana dhammaṃ deseyyaṃ , pare ca me na ājāneyyuṃ , so mamassa kilamatho , sā mamassa vihesā ’ ti .

Apissu maṃ , brahme , imā anacchariyā gāthāyo paṭibhaṃsu pubbe assutapubbā –

‘ Kicchena me adhigataṃ , halaṃ dāni pakāsituṃ ;

Rāgadosaparetehi , nāyaṃ dhammo susambudho .

‘ Paṭisotagāmiṃ nipuṇaṃ , gambhīraṃ duddasaṃ aṇuṃ ;

Rāgarattā na dakkhanti , tamokhandhena āvuṭā ’ ti .

ItihaM0.9 me , brahme , paṭisañcikkhato appossukkatāya cittaṃ namati , no dhammadesanāyā ’’ ti .

Tatiyampi kho brahmā sahampati bhagavantaṃ etadavoca –

‘‘ desetu , bhante , bhagavā dhammaṃ , desetu sugato dhammaṃ .

Santi sattā apparajakkhajātikā , assavanatā dhammassa parihāyanti , bhavissantiV0.9 dhammassa aññātāro ’’ ti .

Idamavoca brahmā sahampati , idaṃ vatvāna athāparaṃ etadavoca –

‘‘ Pāturahosi magadhesu pubbe ;

Dhammo asuddho samalehi cintito ;

Apāpuretaṃ amatassa dvāraṃ ;

Suṇantu dhammaṃ vimalenānubuddhaṃ .

‘‘ Sele yathā pabbatamuddhaniṭṭhito ;

Yathāpi passe janataṃ samantato ;

Tathūpamaṃ dhammamayaṃ sumedha ;

Pāsādamāruyha samantacakkhu ;

Sokāvatiṇṇaṃ janatamapetasoko ;

Avekkhassu jātijarābhibhūtaṃ .

‘‘ Uṭṭhehi vīra vijitasaṅgāma ;

Satthavāha aṇaṇa vicara loke ;

Desassu bhagavā dhammaṃ ;

Aññātāro bhavissantī ’’ ti .

9. AthaT1.11 kho bhagavā brahmuno ca ajjhesanaṃ viditvā sattesu ca kāruññataṃ paṭicca buddhacakkhunā lokaṃ volokesi .

Addasā kho bhagavā buddhacakkhunā lokaṃ volokento satte apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye , appekacce paralokavajjabhayadassāvine [ dassāvino ( sī . syā . kaṃ .)] viharante , appekacce na paralokavajjabhayadassāvine viharante .

Seyyathāpi nāma uppaliniyaṃ vā paduminiyaṃ vā puṇḍarīkiniyaṃ vā appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakānuggatāni anto nimuggaposīniM0.10 , appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni samodakaṃ ṭhitāni , appekaccāni uppalāni vā padumāni vā puṇḍarīkāni vā udake jātāni udake saṃvaḍḍhāni udakaṃ accuggamma ṭhitāni [ tiṭṭhanti ( sī . syā .)] anupalittāni udakena , evamevaṃ bhagavā buddhacakkhunā lokaṃ volokento addasaV0.10 satte apparajakkhe mahārajakkhe tikkhindriyeP1.7 mudindriye svākāre dvākāre suviññāpaye duviññāpaye , appekacce paralokavajjabhayadassāvine viharante , appekacce na paralokavajjabhayadassāvine viharante ;

disvānaT1.12 brahmānaṃ sahampatiṃ gāthāya paccabhāsi –

‘‘ Apārutā tesaṃ amatassa dvārā ;

Ye sotavanto pamuñcantu saddhaṃ ;

Vihiṃsasaññī paguṇaṃ na bhāsiṃ ;

Dhammaṃ paṇītaṃ manujesu brahme ’’ ti .

Atha kho brahmā sahampati ‘‘ katāvakāso khomhi bhagavatā dhammadesanāyā ’’ ti bhagavantaṃ abhivādetvā padakkhiṇaṃ katvā tatthevantaradhāyi .

Brahmayācanakathā niṭṭhitā .

Issues

Select Version

Mahāvaggapāḷi

Mahāvaggapāḷi