987. Uppādādisaṅkhatalakkhaṇavinivattanatthaṃ ‘‘ aniccadukkhaanattatā ’’ ti vuttaṃ .Uppādādayo pana tadavatthadhammavikārabhāvato taṃtaṃdhammaggahaṇena gahitāyeva .Tathā hi vuttaṃ ‘‘ jarāmaraṇaṃ dvīhi khandhehi saṅgahitan ’’ ti ( dhātu .71),‘‘ rūpassa upacayo ’’ ti ca ādi .
Kesakumbhādi sabbaṃ nāmaṃ nāmapaññatti , rūpavedanādiupādānā brahmavihārādigocarā upādāpaññatti sattapaññatti , taṃtaṃbhūtanimittaṃ bhāvanāvisesañca upādāya gahetabbo jhānagocaraviseso kasiṇapaññatti .
Paramatthe amuñcitvā vohariyamānāti iminā vihāramañcādipaññattīnaṃ sattapaññattisadisataṃ dasseti , yato tā sattapaññattiggahaṇena gayhanti .Hutvā abhāvapaṭipīḷanaavasavattanākārabhāvato saṅkhatadhammānaṃ ākārabhāvato saṅkhatadhammānaṃ ākāravisesabhūtāni lakkhaṇāni viññattiādayo viya vattabbāni siyuṃ , tāni pana nissayānapekkhaṃ na labbhantīti paññattisabhāvāneva tajjāpaññattibhāvatoti na vuttāni , sattaghaṭādito visesadassanatthaṃ pana aṭṭhakathāyaṃ visuṃ vuttānīti .
Na hi ko … pe … vattuṃ yuttaṃ kusalattikassa nippadesattā .
1029. Abhiññāyuttavajjānaṃ
V0.168 mahaggatānaṃ parittārammaṇattābhāvā ‘‘ mahaggatā vā iddhividhādayo ’’ ti vuttaṃ .Atītaṃsañāṇassa kāmāvacarattā ‘‘ ceto … pe … ñāṇasampayuttā ’’ ti āha .
1050. Upādānehi ādinnāti sambandho .Aññeti upādānārammaṇehi aññe anupādāniyāti attho .Ādikena gahaṇenāti ‘‘ ahaṃ phalaṃ sacchākāsin ’’ ti evaṃ paccavekkhaṇañāṇasaṅkhātena gahaṇena .
Idāni upetatthadīpakassa upa-saddassa vasena upādinna -saddassa
V0.171 atthaṃ vattuṃ ‘‘ upādinnasaddena vā ’’ tiādi vuttaṃ .Tattha nibbānassa anajjhattabhāvato ‘‘ amaggaphaladhammāyeva vuttā ’’ ti āha .Itarehīti ajjhattapadādīhi .