246. Catutthe petāti kālakatā vuccanti .Uttānā sentīti te yebhuyyena uttānakāva sayanti .Atha vā pettivisaye nibbattā petā nāma , te appamaṃsalohitattā aṭṭhisaṅghātajaṭitā ekena passena sayituṃ na sakkonti , uttānāva senti .
Anattamano hotīti tejussadattā sīho migarājā dve purimapāde ekasmiṃ , pacchimapāde ekasmiṃ ṭhāne ṭhapetvā naṅguṭṭhaṃ antarasatthimhi pakkhipitvā purimapādapacchimapādanaṅguṭṭhānaṃ ṭhitokāsaṃ sallakkhetvā dvinnaṃ purimapādānaṃ matthake sīsaṃ ṭhapetvā sayati .Divasampi sayitvā pabujjhamāno na uttasanto pabujjhati , sīsaṃ pana ukkhipitvā purimapādādīnaṃ ṭhitokāsaṃ sallakkhetvā sace kiñci ṭhānaṃ
V2.393 vijahitvā ṭhitaṃ hoti ,‘‘ nayidaṃ tuyhaṃ jātiyā , na sūrabhāvassa anurūpan ’’ ti anattamano hutvā tattheva sayati , na gocarāya pakkamati .Idaṃ sandhāya vuttaṃ –‘‘ anattamano hotī ’’ ti .Avijahitvā ṭhite pana ‘‘ tuyhaṃ jātiyā ca sūrabhāvassa ca anurūpamidan ’’ ti haṭṭhatuṭṭho uṭṭhāya sīhavijambhanaṃ vijambhitvā kesarabhāraṃ vidhunitvā tikkhattuṃ sīhanādaṃ
P3.219 naditvā gocarāya pakkamati .Tena vuttaṃ –‘‘ attamano hotī ’’ ti .