3. Mahākappinattheraapadānaṃ
66.
‘‘ Padumuttaro
T2.186 nāma jino , sabbadhammāna pāragū ;Udito ajaṭākāse [ jagadākāse ( sī .), jaladākāse ( pī .)], ravīva saradambare .
67.
‘‘ Vacanābhāya bodheti , veneyyapadumāni so ;
Kilesapaṅkaṃ soseti , matiraṃsīhi nāyako .
68.
‘‘ Titthiyānaṃ yase [ yaso ( sī . pī .)] hanti , khajjotābhā yathā ravi ;
Saccatthābhaṃ pakāseti , ratanaṃva divākaro .
69.
‘‘ Guṇānaṃ āyatibhūto , ratanānaṃva sāgaro ;
Pajjunnoriva bhūtāni , dhammameghena vassati .
70.
‘‘ Akkhadasso tadā āsiṃ , nagare haṃsasavhaye ;
Upecca dhammamassosiṃ , jalajuttamanāmino .
71.
‘‘ Ovādakassa bhikkhūnaṃ , sāvakassa katāvino ;
Guṇaṃ pakāsayantassa , tappayantassa [ tosayantassa ( sī .), hāsayantassa ( syā .), vāsayantassa ( pī .)] me manaṃ .
72.
‘‘ Sutvā patīto sumano , nimantetvā tathāgataṃ ;
Sasissaṃ bhojayitvāna , taṃ ṭhānamabhipatthayiṃ .
73.
‘‘ Tadā
M2.119 haṃsasamabhāgo , haṃsadundubhinissano [ haṃsadundubhisussaro ( sī .)];Passathetaṃ mahāmattaṃ , vinicchayavisāradaṃ .
74.
‘‘ Patitaṃ pādamūle me , samuggatatanūruhaṃ ;
Jīmūtavaṇṇaṃ pīṇaṃsaṃ , pasannanayanānanaṃ .
75.
‘‘ Parivārena
T2.187 mahatā , rājayuttaṃ mahāyasaṃ ;Eso katāvino ṭhānaṃ , pattheti muditāsayo .
76.
‘‘‘ Iminā
V2.117P2.469 paṇipātena , cāgena paṇidhīhi ca [ piṇḍapātena , cetanā paṇidhīhi ca ( sī .)];Kappasatasahassāni , nupapajjati duggatiṃ .
77.
‘‘‘ Devesu devasobhaggaṃ , manussesu mahantataṃ ;
Anubhotvāna sesena [ abhutvāva sesena ( sī .), anubhotvāva sesena ( syā .)], nibbānaṃ pāpuṇissati .
78.
‘‘‘ Satasahassito kappe , okkākakulasambhavo ;
Gotamo nāma gottena , satthā loke bhavissati .
79.
‘‘‘ Tassa dhammesu dāyādo , oraso dhammanimmito ;
Kappino nāma nāmena , hessati satthu sāvako ’.
80.
‘‘ Tatohaṃ sukataṃ kāraṃ , katvāna jinasāsane ;
Jahitvā mānusaṃ dehaṃ , tusitaṃ agamāsahaṃ .
81.
‘‘ Devamānusarajjāni , sataso anusāsiya ;
Bārāṇasiyamāsanne , jāto keniyajātiyaṃ .
82.
‘‘ Sahassaparivārena [ satasahassaparivāro ( syā .)], sapajāpatiko ahaṃ ;
Pañca paccekabuddhānaṃ , satāni samupaṭṭhahiṃ .
83.
‘‘ Temāsaṃ bhojayitvāna , pacchādamha ticīvaraṃ ;
Tato cutā mayaṃ sabbe , ahumha tidasūpagā .
84.
‘‘ Puno sabbe manussattaṃ , agamimha tato cutā ;
Kukkuṭamhi pure jātā , himavantassa passato .
85.
‘‘ Kappino
T2.188M2.120 nāmahaṃ āsiṃ , rājaputto mahāyaso ;Sesāmaccakule jātā , mameva parivārayuṃ .
86.
‘‘ Mahārajjasukhaṃ patto , sabbakāmasamiddhimā ;
Vāṇijehi samakkhātaṃ , buddhuppādamahaṃ suṇiṃ .
87.
‘‘‘ Buddho loke samuppanno , asamo ekapuggalo ;
So pakāseti saddhammaṃ , amataṃ sukhamuttamaṃ .
88.
‘‘‘ Suyuttā tassa sissā ca , sumuttā ca anāsavā ’;
‘‘ Sutvā nesaṃ suvacanaṃ , sakkaritvāna vāṇije .
89.
‘‘ Pahāya rajjaṃ sāmacco , nikkhamiṃ buddhamāmako ;
Nadiṃ disvā mahācandaṃ , pūritaṃ samatittikaṃ .
90.
‘‘ Appatiṭṭhaṃ
V2.118 anālambaṃ , duttaraṃ sīghavāhiniṃ ;Guṇaṃ saritvā buddhassa , sotthinā samatikkamiṃ .
91.
‘‘‘ Bhavasotaṃ sace buddho , tiṇṇo lokantagū vidū [ vibhū ( ka .)];
Etena saccavajjena , gamanaṃ me samijjhatu .
92.
‘‘‘ Yadi
P2.470 santigamo maggo , mokkho caccantikaṃ [ mokkhadaṃ santikaṃ ( syā .)] sukhaṃ ;Etena saccavajjena , gamanaṃ me samijjhatu .
93.
‘‘‘ Saṅgho ce tiṇṇakantāro , puññakkhetto anuttaro ;
Etena saccavajjena , gamanaṃ me samijjhatu ’.
94.
‘‘ Saha kate saccavare , maggā apagataṃ jalaṃ ;
Tato sukhena uttiṇṇo , nadītīre manorame .
95.
‘‘ Nisinnaṃ
T2.189 addasaṃ buddhaṃ , udentaṃva pabhaṅkaraṃ ;Jalantaṃ hemaselaṃva , dīparukkhaṃva jotitaṃ .
96.
‘‘ Sasiṃva tārāsahitaṃ , sāvakehi purakkhataṃ ;
Vāsavaṃ viya vassantaṃ , desanājaladantaraṃ [ devena jalanandanaṃ ( syā . pī .)].
97.
‘‘ Vanditvāna sahāmacco , ekamantamupāvisiṃ ;
Tato no āsayaṃ [ tato ajjhāsayaṃ ( syā .)] ñatvā , buddho dhammamadesayi .
98.
‘‘ Sutvāna
M2.121 dhammaṃ vimalaṃ , avocumha mayaṃ jinaṃ ;‘ Pabbājehi mahāvīra , nibbindāmha [ nibbinnāmha ( sī . pī .), otiṇṇamha ( syā .)] mayaṃ bhave ’.
99.
‘‘‘ Svakkhāto bhikkhave dhammo , dukkhantakaraṇāya vo ;
Caratha brahmacariyaṃ ’, iccāha munisattamo .
100.
‘‘ Saha vācāya sabbepi , bhikkhuvesadharā mayaṃ ;
Ahumha upasampannā , sotāpannā ca sāsane .
101.
‘‘ Tato jetavanaṃ gantvā , anusāsi vināyako ;
Anusiṭṭho jinenāhaṃ , arahattamapāpuṇiṃ .
102.
‘‘ Tato bhikkhusahassāni [ bhikkhusahassaṃ taṃ ( sī . pī .)], anusāsimahaṃ tadā ;
Mamānusāsanakarā , tepi āsuṃ anāsavā .
103.
‘‘ Jino tasmiṃ guṇe tuṭṭho , etadagge ṭhapesi maṃ ;
Bhikkhuovādakānaggo , kappinoti mahājane .
104.
‘‘ Satasahasse
V2.119 kataṃ kammaṃ , phalaṃ dassesi me idha ;Pamutto saravegova , kilese jhāpayiṃ [ jhāpayī ( sī .)] mama .
105.
‘‘ Kilesā
T2.190 jhāpitā mayhaṃ … pe … viharāmi anāsavo . 106.
‘‘ Svāgataṃ vata me āsi … pe … kataṃ buddhassa sāsanaṃ .
107.
‘‘ Paṭisambhidā catasso … pe … kataṃ buddhassa sāsanaṃ ’’.
Itthaṃ sudaṃ āyasmā mahākappino thero imā gāthāyo
Abhāsitthāti .
Mahākappinattherassāpadānaṃ tatiyaṃ .