6. Bāhiyattheraapadānaṃ
178.
‘‘ Ito
T2.198 satasahassamhi , kappe uppajji nāyako ;Mahappabho tilokaggo , nāmena padumuttaro .
179.
‘‘ Khippābhiññassa bhikkhussa , guṇaṃ kittayato mune ;
Sutvā udaggacittohaṃ , kāraṃ katvā mahesino .
180.
‘‘ Datvā sattāhikaṃ dānaṃ , sasissassa mune ahaṃ ;
Abhivādiya sambuddhaṃ , taṃ ṭhānaṃ patthayiṃ tadā .
181.
‘‘ Tato maṃ byākari buddho ,‘ etaṃ passatha brāhmaṇaṃ ;
Patitaṃ pādamūle me , cariyaṃ paccavekkhaṇaṃ [ pasannanayanānanaṃ ( sī .), pīnasampannavekkhaṇaṃ ( syā .), pīṇaṃsaṃ paccavekkhaṇaṃ ( pī .)].
182.
‘‘‘ Hemayaññopacitaṅgaṃ
V2.125P2.476 , avadātatanuttacaṃ ;Palambabimbatamboṭṭhaṃ , setatiṇhasamaṃ dijaṃ .
183.
‘‘‘ Guṇathāmabahutaraṃ , samuggatatanūruhaṃ ;
Guṇoghāyatanībhūtaṃ , pītisamphullitānanaṃ .
184.
‘‘‘ Eso patthayate ṭhānaṃ , khippābhiññassa bhikkhuno ;
Anāgate mahāvīro , gotamo nāma hessati .
185.
‘‘‘ Tassa
M2.128 dhammesu dāyādo , oraso dhammanimmito ;Bāhiyo nāma nāmena , hessati satthu sāvako ’.
186.
‘‘ Tadā hi tuṭṭho vuṭṭhāya , yāvajīvaṃ mahāmune ;
Kāraṃ katvā cuto saggaṃ , agaṃ sabhavanaṃ yathā .
187.
‘‘ Devabhūto
T2.199 manusso vā , sukhito tassa kammuno ;Vāhasā saṃsaritvāna , sampattimanubhomahaṃ .
188.
‘‘ Puna kassapavīrassa , atthamentamhi [ atthaṅgatamhi ( syā .)] sāsane ;
Āruyha selasikharaṃ , yuñjitvā jinasāsanaṃ .
189.
‘‘ Visuddhasīlo sappañño , jinasāsanakārako ;
Tato cutā pañca janā , devalokaṃ agamhase .
190.
‘‘ Tatohaṃ bāhiyo jāto , bhārukacche puruttame ;
Tato nāvāya pakkhando [ pakkhanto ( sī .), pakkanto ( pī .)], sāgaraṃ appasiddhiyaṃ [ atthasiddhiyaṃ ( ka .)].
191.
‘‘ Tato nāvā abhijjittha , gantvāna katipāhakaṃ ;
Tadā bhīsanake ghore , patito makarākare .
192.
‘‘ Tadāhaṃ vāyamitvāna , santaritvā mahodadhiṃ ;
Suppādapaṭṭanavaraṃ [ suppārapaṭṭanavaraṃ ( sī . pī .)], sampatto mandavedhito [ mandamedhiko ( sī .), mandavedito ( syā .), maddaverataṃ ( ka .)].
193.
‘‘ Dārucīraṃ nivāsetvā , gāmaṃ piṇḍāya pāvisiṃ ;
Tadāha so jano tuṭṭho , arahāyamidhāgato .
194.
‘‘ Imaṃ annena pānena , vatthena sayanena ca ;
Bhesajjena ca sakkatvā , hessāma sukhitā mayaṃ .
195.
‘‘ Paccayānaṃ tadā lābhī , tehi sakkatapūjito ;
Arahāhanti saṅkappaṃ , uppādesiṃ ayoniso .
196.
‘‘ Tato
V2.126P2.477 me cittamaññāya , codayī pubbadevatā ;‘ Na tvaṃ upāyamaggaññū , kuto tvaṃ arahā bhave ’.
197.
‘‘ Codito
T2.200 tāya saṃviggo , tadāhaṃ paripucchi taṃ ;‘ Ke vā ete kuhiṃ loke , arahanto naruttamā .
198.
‘‘‘ Sāvatthiyaṃ
M2.129 kosalamandire jino , pahūtapañño varabhūrimedhaso ;So sakyaputto arahā anāsavo , deseti dhammaṃ arahattapattiyā .
199.
‘‘‘ Tadassa sutvā vacanaṃ supīṇito [ pīṇitvā ( ka .)], nidhiṃva laddhā kapaṇoti vimhito ;
Udaggacitto arahattamuttamaṃ , sudassanaṃ daṭṭhumanantagocaraṃ .
200.
‘‘‘ Tadā tato nikkhamitvāna satthuno [ nikkhamituna satthuvaraṃ ( sī .)], sadā jinaṃ passāmi vimalānanaṃ [ parājinaṃ passāmi kamalānanaṃ ( ka .)];
Upecca rammaṃ vijitavhayaṃ vanaṃ , dije apucchiṃ kuhiṃ lokanandano .
201.
‘‘‘ Tato avocuṃ naradevavandito , puraṃ paviṭṭho asanesanāya so ;
Sasova [ paccehi ( sī . syā .)] khippaṃ munidassanussuko , upecca vandāhi tamaggapuggalaṃ ’.
202.
‘‘ Tatohaṃ tuvaṭaṃ gantvā , sāvatthiṃ puramuttamaṃ ;
Vicarantaṃ tamaddakkhiṃ , piṇḍatthaṃ apihāgidhaṃ .
203.
‘‘ Pattapāṇiṃ
T2.201 alolakkhaṃ , pācayantaṃ pītākaraṃ [ bhājayantaṃ viyāmataṃ ( sī .), jotayantaṃ idhāmataṃ ( syā .), bhājayantaṃ idaṃmataṃ ( pī .)];Sirīnilayasaṅkāsaṃ , ravidittiharānanaṃ .
204.
‘‘ Taṃ samecca nipaccāhaṃ , idaṃ vacanamabraviṃ ;
‘ Kupathe vippanaṭṭhassa , saraṇaṃ hohi gotama .
205.
‘‘‘ Pāṇasantāraṇatthāya
P2.478 , piṇḍāya vicarāmahaṃ ;Na te dhammakathākālo , iccāha munisattamo ’.
206.
‘‘ Tadā punappunaṃ buddhaṃ , āyāciṃ dhammalālaso ;
Yo me dhammamadesesi , gambhīraṃ suññataṃ padaṃ .
207.
‘‘ Tassa
M2.130 dhammaṃ suṇitvāna , pāpuṇiṃ āsavakkhayaṃ ;Parikkhīṇāyuko santo , aho satthānukampako .
208.
‘‘ Kilesā jhāpitā mayhaṃ … pe … viharāmi anāsavo .
209.
‘‘ Svāgataṃ vata me āsi … pe … kataṃ buddhassa sāsanaṃ .
210.
‘‘ Paṭisambhidā catasso … pe … kataṃ buddhassa sāsanaṃ .
211.
‘‘ Evaṃ thero viyākāsi , bāhiyo dārucīriyo ;
Saṅkārakūṭe patito , bhūtāviṭṭhāya gāviyā .
212.
‘‘ Attano
V2.127 pubbacariyaṃ , kittayitvā mahāmati ;Parinibbāyi so thero [ vīro ( sī .), dhīro ( syā .)], sāvatthiyaṃ puruttame .
213.
‘‘ Nagarā
T2.202 nikkhamanto taṃ , disvāna isisattamo ;Dārucīradharaṃ dhīraṃ , bāhiyaṃ bāhitāgamaṃ .
214.
‘‘ Bhūmiyaṃ patitaṃ dantaṃ , indaketūva pātitaṃ ;
Gatāyuṃ sukkhakilesaṃ [ gatāyu saṃgataklesaṃ ( sī . pī .), tadāyu saṅkatālesaṃ ( ka .)], jinasāsanakārakaṃ .
215.
‘‘ Tato āmantayī satthā , sāvake sāsane rate ;
‘ Gaṇhatha netvā [ hutvā ( syā . pī . ka .)] jhāpetha , tanuṃ sabrahmacārino .
216.
‘‘‘ Thūpaṃ karotha pūjetha , nibbuto so mahāmati ;
Khippābhiññānamesaggo , sāvako me vacokaro .
217.
‘‘‘ Sahassamapi ce gāthā , anatthapadasañhitā ;
Ekaṃ gāthāpadaṃ seyyo , yaṃ sutvā upasammati .
218.
‘‘‘ Yattha āpo ca pathavī , tejo vāyo na gādhati ;
Na tattha sukkā jotanti , ādicco na pakāsati .
219.
‘‘‘ Na tattha candimā bhāti , tamo tattha na vijjati ;
Yadā ca attanā vedi , munimonena brāhmaṇo .
220.
‘‘‘ Atha
M2.131 rūpā arūpā ca , sukhadukkhā vimuccati ’;Iccevaṃ abhaṇī nātho , tilokasaraṇo muni ’’.
Itthaṃ sudaṃ āyasmā bāhiyo thero imā gāthāyo
Abhāsitthāti .
Bāhiyattherassāpadānaṃ chaṭṭhaṃ .