107. Chaṭṭhe yatthāti cakkavāḷalokassa ekokāse bhummaṃ .Na cavati na upapajjatīti idaṃ aparāparaṃ cutipaṭisandhivasena gahitaṃ .Gamanenāti padagamanena .

Nāhaṃ taṃ lokassa antan ti satthā saṅkhāralokassa antaṃ sandhāya vadati .Ñāteyyan tiādīsu ñātabbaṃ , daṭṭhabbaṃ , pattabbanti attho .

Iti devaputtena cakkavāḷalokassa anto pucchito , satthārā saṅkhāralokassa kathito .So pana attano pañhena saddhiṃ satthu byākaraṇaṃ sametīti saññāya pasaṃsanto acchariyan tiādimāha .

DaḷhadhammotiV1.105 daḷhadhanu , uttamappamāṇena dhanunā samannāgato .Dhanuggahoti dhanuācariyo .SusikkhitotiP1.117 dasa dvādasa vassāni dhanusippaṃ sikkhito .Katahatthoti usabhappamāṇepi vālaggaṃ vijjhituṃ samatthabhāvena katahattho .Katūpāsanoti katasarakkhepo dassitasippo .Asanenāti kaṇḍena .Atipāteyyāti atikkameyya .Yāvatā so tālacchāyaṃ atikkameyya , tāvatā kālena ekacakkavāḷaṃ atikkamāmīti attano javasampattiṃ dasseti .

Puratthimā samuddā pacchimoti yathā puratthimasamuddā pacchimasamuddo dūre , evaṃ me dūre padavītihāro ahosīti vadati .So kira pācīnacakkavāḷamukhavaṭṭiyaṃ ṭhito pādaṃ pasāretvā pacchimacakkavāḷamukhavaṭṭiyaṃ akkamati , puna dutiyaṃ pādaṃ pasāretvā paracakkavāḷamukhavaṭṭiyaṃ akkamati .

Icchāgatan ti icchā eva .

Aññatrevāti nippapañcataṃ dasseti .Bhikkhācārakāle kiresa nāgalatādantakaṭṭhaṃ khāditvā anotatte mukhaṃ dhovitvā kāle sampatte uttarakurumhi piṇḍāya caritvā cakkavāḷamukhavaṭṭiyaṃ nisinno bhattakiccaṃ karoti , tattha muhuttaṃ vissamitvā puna javati .Vassasatāyukoti tadā dīghāyukakālo hoti , ayaṃ pana vassasatāvasiṭṭheM1.109 āyumhi gamanaṃ ārabhi .Vassasatajīvīti taṃ vassasataṃ anantarāyena jīvanto .Antarāva kālaṅkatoti cakkavāḷalokassa antaṃ appatvā antarāva mato .So pana tattha kālaṃ katvāpi āgantvā imasmiṃyeva cakkavāḷe nibbatti .

Appatvāti saṅkhāralokassa antaṃ appatvā .Dukkhassāti vaṭṭadukkhassa .Antakiriyan ti pariyantakaraṇaṃ .

KinteV1.46 padasā okāsalokaparibbhamanena , parimitaṭṭhāne eva taṃ ñāṇagamanena gacchantānaṃ dassemīti dassento api cātiādimāha .Tattha byāmamatte kaḷevareti sarīre .Tena rūpakkhandhaṃ dasseti . Kaḷevareti attabhāve .Sasaññimhi samanaketi sasaññe sacitte . Sasaññimhīti saññāsīsena vedanādayo tayo khandhe .Samanaketi viññāṇakkhandhaṃ . Lokan ti dukkhasaccaṃ . Lokan ti khandhādilokaṃ , dukkhanti attho . Lokasamudayan ti samudayasaccaṃ .Lokanirodhan ti nirodhasaccaṃ . Lokanirodhan ti nibbānena lokassa nirujjhanaṃ , nibbānameva vā .Adesampi hi nibbānaṃ yesaṃ nirodhāya hoti , upacārato tannissitaṃ viya hotīti ‘‘ byāmamatte kaḷevare lokanirodhampi paññapemī ’’ ti vuttaṃ , cakkhu loke piyarūpaṃ , sātarūpaṃ , etthesā taṇhā nirujjhamānā nirujjhatītiādīsu ( dī . ni .2.401; vibha .204) viya . Paṭipadan ti maggasaccaṃ .Iti –‘‘ nāhaṃ , āvuso , imāni cattāri saccāni tiṇakaṭṭhādīsu paññapemiP1.118 , imasmiṃ pana cātumahābhūtike kāyasmiṃ yeva paññapemī ’’ ti dasseti .

Kudācanan ti kadācipi .

Appatvāti aggamaggena anadhigantvā .

Tasmāti yasmā taṃ gamanena pattuṃ na sakkā , tasmā .Haveti nipātamattaṃ , ekaṃsatthe vāM1.52 .Lokavidūti sabhāvādito khandhādijānanako .

Samitāvīti samitapāpo .Catusaccadhammānaṃ abhisamitattā samitāvī , samitakilesoti vā attho .

Nāsīsatīti na pattheti .Nāsīsati na pattheti appaṭisandhikattā .Chaṭṭhaṃ .