147. Svākkhātoti imasmiṃ hi pade pariyattidhammopi saṅgahaṃ gacchati , itaresu lokuttaradhammova .Tathā hi pariyattidhammo bahussutena āgatāgamena paramena satinepakkena samannāgatena paññavatā ādikalyāṇatādivisesato sayaṃ daṭṭhabboti sandiṭṭhiko .
Akālikādhigamupāyatāya akāliko .
Vijjamānatāparisuddhatāhi ehipassavidhiṃ arahatīti ehipassiko .
Tato eva vaṭṭadukkhanittharaṇatthikehiV1.253 attano citte upanayanaṃ , cittassa vā tattha upanayanaṃ arahatīti opaneyyiko .
Vimuttāyatanasīse ṭhatvā paricayena sammadeva atthavedaṃ , dhammavedañca labhantehi paccattaṃ veditabbo viññūhīti .
Evaṃ sandiṭṭhikādipadesu pariyattidhammampi pakkhipitvā manasikāro yujjateva .
148. SandiṭṭhikotiM1.209 ettha pana ariyamaggo tāva attano santāne rāgādīnaṃ abhāvaṃ karontena ariyapuggalena sāmaṃ daṭṭhabboti sandiṭṭhiko .
Apica navavidhopi lokuttaradhammo yena yena adhigato hoti , tena tena parasaddhāya gantabbataṃ hitvā paccavekkhaṇañāṇena sayaṃ daṭṭhabboti sandiṭṭhiko .
Atha vā pasatthā diṭṭhi sandiṭṭhi , sandiṭṭhiyā jayatīti sandiṭṭhiko .
Sandiṭṭhaṃ arahatīti sandiṭṭhiko .
149. Attano phaladānaṃ sandhāya nāssa kāloti akālo .
Akāloyeva akāliko .
Na pañcāhasattāhādibhedaṃ kālaṃ khepetvā phalaṃ deti , attano pana pavattisamanantarameva phaladoti vuttaṃ hoti .
Atha vā attano phaladāne pakaṭṭho kālo patto assāti kāliko .
Ayaṃ pana samanantaraphalattā na kālikoti akāliko .
Idaṃ maggameva sandhāya vuttaṃ .
150.‘‘ Ehi passa imaṃ dhamman ’’ ti evaṃ pavattaṃ ehipassavidhiṃ arahatīti ehipassiko .
151. Upanetabboti opaneyyiko .
Ayaṃ panettha vinicchayo , upanayanaṃ upanayo , ādittaṃ celaṃ vā sīsaṃ vā ajjhupekkhitvāpi bhāvanāvasena attano citte upanayanaṃ arahatīti opanayiko .
Asaṅkhate pana attano cittena upanayanaṃ arahatīti opaneyyiko .
152. Paccattaṃ veditabbo viññūhīti sabbehipi ugghaṭitaññūādīhi viññūhi attani attani veditabbo ‘‘ bhāvito me maggo , adhigataṃ phalaṃ , sacchikato nirodho ’’ ti .
Na hi upajjhāyena bhāvitena maggena saddhivihārikassa kilesā pahīyanti , na so tassa phalasamāpattiyā phāsuviharati , na tena sacchikataṃ nibbānaṃ sacchikaroti .