19. Dhammaṭṭhavaggo
256.
Na
P0.38 tena hoti dhammaṭṭho , yenatthaṃ sāhasā [ sahasā ( sī . syā . ka .)] naye ;Yo ca atthaṃ anatthañca , ubho niccheyya paṇḍito .
257.
Asāhasena
V0.46 dhammena , samena nayatī pare ;Dhammassa gutto medhāvī ,‘‘ dhammaṭṭho ’’ ti pavuccati .
258.
Na tena paṇḍito hoti , yāvatā bahu bhāsati ;
Khemī averī abhayo ,‘‘ paṇḍito ’’ ti pavuccati .
259.
Na tāvatā dhammadharo , yāvatā bahu bhāsati ;
Yo ca appampi sutvāna , dhammaṃ kāyena passati ;
Sa ve dhammadharo hoti , yo dhammaṃ nappamajjati .
260.
Na
M0.51 tena thero so hoti [ thero hoti ( sī . syā .)], yenassa palitaṃ siro ;Paripakko
T0.50 vayo tassa ,‘‘ moghajiṇṇo ’’ ti vuccati . 261.
Yamhi saccañca dhammo ca , ahiṃsā saṃyamo damo ;
Sa ve vantamalo dhīro ,‘‘ thero ’’ iti [ so theroti ( syā . ka .)] pavuccati .
262.
Na vākkaraṇamattena , vaṇṇapokkharatāya vā ;
Sādhurūpo naro hoti , issukī maccharī saṭho .
263.
Yassa cetaṃ samucchinnaṃ , mūlaghaccaṃ samūhataṃ ;
Sa vantadoso medhāvī ,‘‘ sādhurūpo ’’ ti vuccati .
264.
Na muṇḍakena samaṇo , abbato alikaṃ bhaṇaṃ ;
Icchālobhasamāpanno , samaṇo kiṃ bhavissati .
265.
Yo
P0.39 ca sameti pāpāni , aṇuṃ thūlāni sabbaso ;Samitattā hi pāpānaṃ ,‘‘ samaṇo ’’ ti pavuccati .
266.
Na
V0.47 tena bhikkhu so hoti , yāvatā bhikkhate pare ;Vissaṃ dhammaṃ samādāya , bhikkhu hoti na tāvatā .
267.
Yodha puññañca pāpañca , bāhetvā brahmacariyavā [ brahmacariyaṃ ( ka .)];
Saṅkhāya loke carati , sa ve ‘‘ bhikkhū ’’ ti vuccati .
268.
Na monena munī hoti , mūḷharūpo aviddasu ;
Yo ca tulaṃva paggayha , varamādāya paṇḍito .
269.
Pāpāni
M0.52 parivajjeti , sa munī tena so muni ;Yo munāti ubho loke ,‘‘ muni ’’ tena pavuccati .
270.
Na tena ariyo hoti , yena pāṇāni hiṃsati ;
Ahiṃsā
T0.51 sabbapāṇānaṃ ,‘‘ ariyo ’’ ti pavuccati . 271.
Na sīlabbatamattena , bāhusaccena vā pana ;
Atha vā samādhilābhena , vivittasayanena vā .
272.
Phusāmi nekkhammasukhaṃ , aputhujjanasevitaṃ ;
Bhikkhu vissāsamāpādi , appatto āsavakkhayaṃ .
Dhammaṭṭhavaggo ekūnavīsatimo niṭṭhito .