20. Maggavaggo
273.
Maggānaṭṭhaṅgiko
V0.48P0.40 seṭṭho , saccānaṃ caturo padā ;Virāgo seṭṭho dhammānaṃ , dvipadānañca cakkhumā .
274.
Eseva [ esova ( sī . pī .)] maggo natthañño , dassanassa visuddhiyā ;
Etañhi tumhe paṭipajjatha , mārassetaṃ pamohanaṃ .
275.
Etañhi tumhe paṭipannā , dukkhassantaṃ karissatha ;
Akkhāto vo [ akkhāto ve ( sī . pī .)] mayā maggo , aññāya sallakantanaṃ [ sallasanthanaṃ ( sī . pī .), sallasatthanaṃ ( syā .)].
276.
Tumhehi kiccamātappaṃ , akkhātāro tathāgatā ;
Paṭipannā pamokkhanti , jhāyino mārabandhanā .
277.
‘‘ Sabbe
M0.53 saṅkhārā aniccā ’’ ti , yadā paññāya passati ;Atha
T0.52 nibbindati dukkhe , esa maggo visuddhiyā . 278.
‘‘ Sabbe saṅkhārā dukkhā ’’ ti , yadā paññāya passati ;
Atha nibbindati dukkhe , esa maggo visuddhiyā .
279.
‘‘ Sabbe dhammā anattā ’’ ti , yadā paññāya passati ;
Atha nibbindati dukkhe , esa maggo visuddhiyā .
280.
Uṭṭhānakālamhi anuṭṭhahāno , yuvā balī ālasiyaṃ upeto ;
Saṃsannasaṅkappamano [ asampannasaṅkappamano ( ka .)] kusīto , paññāya maggaṃ alaso na vindati .
281.
Vācānurakkhī
V0.49P0.41 manasā susaṃvuto , kāyena ca nākusalaṃ kayirā [ akusalaṃ na kayirā ( sī . syā . kaṃ . pī .)];Ete tayo kammapathe visodhaye , ārādhaye maggamisippaveditaṃ .
282.
Yogā ve jāyatī [ jāyate ( katthaci )] bhūri , ayogā bhūrisaṅkhayo ;
Etaṃ dvedhāpathaṃ ñatvā , bhavāya vibhavāya ca ;
Tathāttānaṃ niveseyya , yathā bhūri pavaḍḍhati .
283.
Vanaṃ
M0.54 chindatha mā rukkhaṃ , vanato jāyate bhayaṃ ;Chetvā vanañca vanathañca , nibbanā hotha bhikkhavo .
284.
Yāva hi vanatho na chijjati , aṇumattopi narassa nārisu ;
Paṭibaddhamanova [ paṭibandhamanova ( ka .)] tāva so , vaccho khīrapakova [ khīrapānova ( pī .)] mātari .
285.
Ucchinda
T0.53 sinehamattano kumudaṃ sāradikaṃva [ pāṇinā ];Santimaggameva brūhaya , nibbānaṃ sugatena desitaṃ .
286.
Idha vassaṃ vasissāmi , idha hemantagimhisu ;
Iti bālo vicinteti , antarāyaṃ na bujjhati .
287.
Taṃ puttapasusammattaṃ , byāsattamanasaṃ naraṃ ;
Suttaṃ gāmaṃ mahoghova , maccu ādāya gacchati .
288.
Na
P0.42 santi puttā tāṇāya , na pitā nāpi bandhavā ;Antakenādhipannassa , natthi ñātīsu tāṇatā .
289.
Etamatthavasaṃ ñatvā , paṇḍito sīlasaṃvuto ;
Nibbānagamanaṃ maggaṃ , khippameva visodhaye .
Maggavaggo vīsatimo niṭṭhito .