85. Chakkesu ūnadasavassapadaṃ viseso , taṃ sabbattha āpattikaraṃ .Sesaṃ vuttanayeneva veditabbaṃ .
Tattha vitthārenāti ubhatovibhaṅgena saddhiṃ .Svāgatānīti suṭṭhu āgatāni .Tattha ubhayāni kho panassa pātimokkhāni vitthārena na svāgatāni hontīti ubhatovibhaṅgavasena na svāgatāni .
Yathā āgatāni pana svāgatāni honti , taṃ dassetuṃ ‘‘ suvibhattānī ’’ tiādi vuttaṃ .Tattha suvibhattānīti suṭṭhu vibhattāni padapaccābhaṭṭhasaṅkaradosavirahitāni .Na suvibhattānīti mātikāvibhaṅgavasena .Na suppavattīnīti vācuggatavasena .Suppavattīnīti paguṇāni vācuggatāni .Suvinicchitāni suttasoti khandhakaparivārato āharitabbasuttavasena suṭṭhu vinicchitāni .Anubyañjanasoti akkharapadapāripūriyā ca suvinicchitāni akhaṇḍāni aviparītakkharāni .Etena aṭṭhakathā dīpitā , aṭṭhakathāto hi esa vinicchayo hotīti .
Na suvinicchitāni suttaso anubyañjanasoti mātikāto ca vibhaṅgato ca na suṭṭhu vinicchitāni .