Tatthimā uddānagāthā
Taṇhā ca avijjāpi ca , lobho doso tatheva moho ca ;
Cattāro ca vipallāsā , kilesabhūmī nava padāni .
Ye
P0.259 ca satipaṭṭhānā , samatho ca vipassanā kusalamūlā ;Etaṃ sabbaṃ kusalaṃ , indriyabhūmī nava padāni .
Sabbakusalaṃ navahi padehi yujjati , navahi ceva akusalaṃ ;
Ete te mūlapadā , ubhato aṭṭhārasa padāni .
Taṇhā ceva avijjā ca , samatho ca vipassanā ;
Yo neti sabbesu yogayutto , ayaṃ nayo nandiyāvaṭṭo .
Yaṃ kusalamūlehi , nayati kusalaakusalamūlehi ;
Bhūtaṃ tathaṃ avitathaṃ , tipukkhalaṃ taṃ nayaṃ āhu .
So neti vipallāsehi , kilesaindriyehi ca ;
Dhamme taṃ nayaṃ vinayamāhu , sīhavikkīḷitaṃ nāma .
Veyyākaraṇe vutte , kusalatāhi akusalatāhi ca ;
Tayo ālokayati , ayaṃ nayo disālocano nāma .
Oloketvā disālocanena , ukkhipiya yaṃ samāneti ;
Sabbe kusalākusale , ayaṃ nayo aṅkuso nāma .
Nayasamuṭṭhānaṃ .
Peṭakopadese
V0.335 mahākaccāyanassa therassa suttavibhaṅgassa[ vebhaṅgissa ( pī . ka .)] Dassanaṃ samattaṃ .
Yāni
M0.341 catukkāni akusalāni kusalāni ca sīhavikkīḷite naye niddiṭṭhāni , tikāni kusalāni ca akusalāni ca tipukkhale naye niddiṭṭhāni , dukāni kusalāni ca akusalāni ca nandiyāvaṭṭe naye niddiṭṭhāni .Yesu
P0.260 dvīsu dhammesu [ visuddhīsu ( ka .)] kusalesu so attho tikesu vibhajjamānassa bhavabhūmi , atha ca sabbo [ pubbo ( ka .)] ca attho tīhi byañjanehi niddisati .Tattakāni vuccati .
Yo attho catūhi padehi aṭṭhavīsatibhāgehi natthibhūmi niddisituṃ , avacarantova catūhi padehi niddisati .
Iti yaṃ yathāniddiṭṭhassa avikosanā idaṃ pamāṇaṃ .
Yathā sabbe samādhayo tīsu samādhīsu pariyesitabbā , savitakkasavicāre avitakkavicāramatte avitakkaavicāre idaṃ pamāṇaṃ , natthi catuttho samādhi .
Tathā tisso paññā cintāmayī sutamayī bhāvanāmayī sabbāsu paññāsu niddisati , natthi catutthī paññā na cintāmayī na sutamayī na bhāvanāmayī , paññā nāssa atthi imesaṃ dhammānaṃ yā avikkhepanā , idaṃ vuccati pamāṇanti .
Therassa mahākaccāyanassa jambuvanavāsino peṭakopadeso
Samatto .
Peṭakopadesapakaraṇaṃ niṭṭhitaṃ .