Desanāgāminiyādivaṇṇanā
475. Dve saṃvāsakabhūmiyoti ettha bhūmīti avatthā .
Aṅgahīnatā kāraṇavekallavasenapi veditabbāti āha ‘‘ apicetthā ’’ tiādi .
Esa nayoti ‘‘ apicetthā ’’ tiādinā vuttanayo .
Vanappatiṃ chindantassa pārājikan ti adinnādāne vanappatikathāya āgataṃ parasantakaṃ sandhāya vuttaṃ .
Vissaṭṭhichaḍḍaneti sukkavissaṭṭhiyā mocane .
Dukkaṭā katāti dukkaṭaṃ vuttaṃ .
Paṭhamasikkhāpadamhiyevāti bhikkhunovādakavaggassa paṭhamasikkhāpadeyeva .
Āmakadhaññaṃ viññāpetvā bhuñjantiyā pubbapayoge dukkaṭaṃ , ajjhohāre pācittiyaṃ .