345. Dīghamariyādabaddhan ti
M0.380 dīghena mariyādena baddhaṃ .Catukkasaṇṭhānan ti catunnaṃ maggānaṃ samodhānasaṇṭhānaṃ .
Ussahasi tvan ti ettha upubbo sahadhātu samatthatthoti āha ‘‘ sakkosi tvan ’’ ti .Papubbo pana abhibhavanattho hoti ‘‘ pasahatī ’’ tiādīsu .
Yo nāmāti yo ānando ājānissati nāma , so ānando paṇḍitoti yojanā .‘‘ Kusī ’’ ti etaṃ nāmaṃ adhivacananti yojanā .
Anuvātādīnan ti ādisaddena paribhaṇḍādīni saṅgaṇhāti .‘‘ Aḍḍhakusī ’’ ti etanti yojanā .
345. Anuvātādīnaṃ dīghapattānan ti āyāmato , vitthārato ca anuvātaṃ .Ādi -saddena dvinnaṃ khandhānaṃ antarā mātikākārena ṭhapitapattañca ‘‘ dīghapattan ’’ ti daṭṭhabbaṃ .
Gīveyyakan ti ettha gīvāyaṃ suttasaṃsibbitaṃ gīveyyakanti vacanatthaṃ dassento āha ‘‘ gīvāveṭhanaṭṭhāne ’’ tiādi .‘‘ Āgantukapaṭṭan ’’ ti iminā eyyakapaccayassa sarūpaṃ dasseti .Āgantukapattan ti diguṇacīvarassa upari aññaṃ paṭṭaṃ appenti , taṃ sandhāya vuttaṃ .Taṃ kira idāni na karonti .
Eseva nayo jaṅgheyyakan ti etthāpi .
Etaṃ nāman ti ‘‘ gīveyyakaṃ , jaṅgheyyakan ’’ ti etaṃ nāmaṃ .
Itīti evaṃ .Etan ti ‘‘ anuvivaṭṭan ’’ tiādi etaṃ .
‘‘ Anuvivaṭṭan ’’ ti etaṃ nāmanti yojanā .Vivaṭṭassāti majjhimakhaṇḍakassa .
Bāhantan ti ettha bāhāya upari ṭhapitā antā bāhantāti vacanatthaṃ dassento āha ‘‘ bāhāyā ’’ tiādi .Tesan ti ubhinnamantānaṃ .Etan ti ‘‘ bāhantan ’’ ti etaṃ .