Tan ti yathāvuttaṃ pathavīādibhedaṃ .Pariññātan ti parito samantato sabbākārato ñātaṃ , taṃ parijānitabbabhāvaṃ kiñci asesetvā ñātanti attho .
Ayameva hi attho ‘‘ pariññātantan ’’ ti imināpi padena pakāsitoti dassento ‘‘ pariññātantaṃ nāmā ’’ tiādimāha .
Tena tena maggena kilesappahānena viseso natthīti idaṃ taṃtaṃmaggavajjhakilesānaṃ buddhānaṃ sāvakānañca tena tena maggeneva pahātabbabhāvasāmaññaṃ sandhāya vuttaṃ , na sāvakehi buddhānaṃ kilesappahānavisesābhāvato .Tathā hi sammāsambuddhā eva savāsanakilese jahanti , na sāvakā .
Ekadesamevāti attano santānagatameva .Sasantatipariyāpannadhammapariññāmattenapi hi catusaccakammaṭṭhānabhāvanā samijjhati .Tenevāha –‘‘ imasmiṃyeva byāmamatte kaḷevare sasaññimhi samanake lokañca paññapemi lokasamudayañca paññapemī ’’ tiādi ( saṃ . ni .1.107; a . ni .4.45).
Aṇuppamāṇampi
V1.100 … pe … natthi , yato chattiṃsakoṭisatasahassamukhena buddhānaṃ mahāvajirañāṇaṃ pavattatīti vadanti .