Asammāsambuddhappaveditadhammavinayo
166.‘‘ Evaṃ hetaṃ , cunda , hoti durakkhāte dhammavinaye duppavedite
P3.119 aniyyānike anupasamasaṃvattanike asammāsambuddhappavedite .Idha , cunda , satthā ca hoti asammāsambuddho , dhammo ca durakkhāto duppavedito aniyyāniko anupasamasaṃvattaniko asammāsambuddhappavedito , sāvako ca tasmiṃ dhamme na dhammānudhammappaṭipanno viharati na sāmīcippaṭipanno na anudhammacārī , vokkamma ca tamhā dhammā vattati .
So
T3.130 evamassa vacanīyo –‘ tassa te , āvuso , lābhā , tassa te suladdhaṃ , satthā ca te asammāsambuddho , dhammo ca durakkhāto duppavedito aniyyāniko anupasamasaṃvattaniko asammāsambuddhappavedito .
Tvañca tasmiṃ dhamme na dhammānudhammappaṭipanno viharasi , na sāmīcippaṭipanno , na anudhammacārī , vokkamma ca tamhā dhammā vattasī ’ ti .
Iti kho , cunda , satthāpi tattha gārayho , dhammopi tattha gārayho , sāvako ca tattha evaṃ pāsaṃso .
Yo kho , cunda , evarūpaṃ sāvakaṃ evaṃ vadeyya –
‘ etāyasmā tathā paṭipajjatu , yathā te satthārā dhammo desito paññatto ’ ti .
Yo ca samādapeti [ samādāpeti ( sī . ṭṭha .)], yañca samādapeti , yo ca samādapito [ samādāpito ( sī . ṭṭha .)] tathattāya paṭipajjati .
Sabbe te bahuṃ apuññaṃ pasavanti .
Taṃ kissa hetu ?
Evaṃ hetaṃ , cunda , hoti durakkhāte dhammavinaye duppavedite aniyyānike anupasamasaṃvattanike asammāsambuddhappavedite .
167.‘‘ Idha
M3.99 pana , cunda , satthā ca hoti asammāsambuddho , dhammo ca durakkhāto duppavedito aniyyāniko anupasamasaṃvattaniko asammāsambuddhappavedito , sāvako ca tasmiṃ dhammeV3.89 dhammānudhammappaṭipanno viharati sāmīcippaṭipanno anudhammacārī , samādāya taṃ dhammaṃ vattati .So evamassa vacanīyo –
‘ tassa te , āvuso , alābhā , tassa te dulladdhaṃ , satthā ca te asammāsambuddho
P3.120 , dhammo ca durakkhāto duppavedito aniyyāniko anupasamasaṃvattaniko asammāsambuddhappavedito .Tvañca
T3.131 tasmiṃ dhamme dhammānudhammappaṭipanno viharasi sāmīcippaṭipanno anudhammacārī , samādāya taṃ dhammaṃ vattasī ’ ti .Iti kho , cunda , satthāpi tattha gārayho , dhammopi tattha gārayho , sāvakopi tattha evaṃ gārayho .
Yo kho , cunda , evarūpaṃ sāvakaṃ evaṃ vadeyya –
‘ addhāyasmā ñāyappaṭipanno ñāyamārādhessatī ’ ti .
Yo ca pasaṃsati , yañca pasaṃsati , yo ca pasaṃsito bhiyyoso mattāya vīriyaṃ ārabhati .
Sabbe te bahuṃ apuññaṃ pasavanti .
Taṃ kissa hetu ?
Evañhetaṃ , cunda , hoti durakkhāte dhammavinaye duppavedite aniyyānike anupasamasaṃvattanike asammāsambuddhappavedite .