2. Dutiyavaggo
278.‘‘ Aṭṭhānametaṃ
V1.40 , bhikkhave , anavakāso yaṃ ekissā lokadhātuyā dve rājāno cakkavattī apubbaṃ acarimaṃ uppajjeyyuṃ .Netaṃ ṭhānaṃ vijjati
M1.30 .Ṭhānañca kho etaṃ , bhikkhave , vijjati yaṃ ekissā lokadhātuyā eko rājā cakkavattī uppajjeyya .
Ṭhānametaṃ vijjatī ’’ ti .
279.‘‘ Aṭṭhānametaṃ , bhikkhave , anavakāso yaṃ itthī arahaṃ assa sammāsambuddho .
Netaṃ ṭhānaṃ vijjati .
Ṭhānañca kho , etaṃ , bhikkhave , vijjati yaṃ puriso arahaṃ assa sammāsambuddho .
Ṭhānametaṃ vijjatī ’’ ti .
280.‘‘ Aṭṭhānametaṃ
T1.37 , bhikkhave , anavakāso yaṃ itthī rājā assa cakkavattī .Netaṃ ṭhānaṃ vijjati .
Ṭhānañca kho etaṃ , bhikkhave , vijjati yaṃ puriso rājā assa cakkavattī .
Ṭhānametaṃ vijjatī ’’ ti .
281-283.
‘‘ Aṭṭhānametaṃ , bhikkhave , anavakāso yaṃ itthī sakkattaṃ kāreyya … pe … mārattaṃ kāreyya … pe … brahmattaṃ kāreyya .
Netaṃ ṭhānaṃ vijjati .
Ṭhānañca kho etaṃ , bhikkhave , vijjati yaṃ puriso sakkattaṃ kāreyya … pe … mārattaṃ kāreyya … pe … brahmattaṃ kāreyya .
Ṭhānametaṃ vijjatī ’’ ti .
284.‘‘ Aṭṭhānametaṃ , bhikkhave , anavakāso yaṃ kāyaduccaritassa iṭṭho kanto manāpo vipāko nibbatteyya .
Netaṃ ṭhānaṃ vijjati .
Ṭhānañca kho etaṃ , bhikkhave , vijjati yaṃ kāyaduccaritassa aniṭṭho akanto amanāpo vipāko nibbatteyya .
Ṭhānametaṃ vijjatī ’’ ti .
285-286.
‘‘ Aṭṭhānametaṃ , bhikkhave , anavakāso yaṃ vacīduccaritassa … pe … yaṃ manoduccaritassa iṭṭho kanto manāpo vipāko nibbatteyya .
Netaṃ ṭhānaṃ vijjati .
Ṭhānañca kho etaṃ , bhikkhave , vijjati yaṃ manoduccaritassa aniṭṭho akanto amanāpo vipāko nibbatteyya .
Ṭhānametaṃ vijjatī ’’ ti .
Vaggo dutiyo .