1. Samādhibhāvanāsuttavaṇṇanā
41. Pañcamassa
V2.295 paṭhame ñāṇadassanappaṭilābhāyāti dibbacakkhuñāṇadassanassa paṭilābhāya .Divāsaññaṃ adhiṭṭhātīti divāti evaṃ saññaṃ adhiṭṭhāti .
Yathā divā tathā rattin ti yathā divā ālokasaññā manasi katā , tatheva taṃ rattimpi manasi karoti .
Dutiyapadepi eseva nayo .
Sappabhāsan ti dibbacakkhuñāṇobhāsena sahobhāsaṃ .
Kiñcāpi
P3.85 ālokasadisaṃ kataṃ , attho panettha na evaṃ sallakkhetabbo .Dibbacakkhuñāṇāloko hi idhādhippeto .
Viditāti pākaṭā hutvā .
Kathaṃ pana vedanā viditā uppajjanti , viditā abbhatthaṃ gacchantīti ?
Idha bhikkhu vatthuṃ pariggaṇhāti , ārammaṇaṃ pariggaṇhāti .
Tassa pariggahitavatthārammaṇatāya tā vedanā ‘‘ evaṃ uppajjitvā evaṃ ṭhatvā evaṃ nirujjhantī ’’ ti viditā uppajjanti , viditā tiṭṭhanti , viditā abbhatthaṃ gacchanti nāma .
Saññāvitakkesu pi eseva nayo .
Udayabbayānupassīti udayañca vayañca passanto .
Iti rūpan ti evaṃ rūpaṃ ettakaṃ rūpaṃ na ito paraṃ rūpaṃ atthīti .
Iti rūpassa samudayoti evaṃ rūpassa uppādo .
Atthaṅgamoti pana bhedo adhippeto .
Vedanādīsu pi eseva nayo .
Idañca pana metaṃ , bhikkhave , sandhāya bhāsitan ti , bhikkhave , yaṃ mayā etaṃ puṇṇakapañhe ‘‘ saṅkhāya lokasmin ’’ tiādi bhāsitaṃ , taṃ idaṃ phalasamāpattiṃ sandhāya bhāsitanti attho .
Tattha saṅkhāyāti ñāṇena jānitvā .
Lokasmin ti sattaloke .
Paroparānīti uccāvacāni uttamādhamāni .
Iñjitan ti calitaṃ .
Natthi kuhiñci loketi
M2.304 lokasmiṃ katthaci ekakkhandhepi ekāyatanepi ekadhātuyāpi ekārammaṇepi natthi .Santoti paccanīkakilesavūpasamena santo .
Vidhūmoti
V2.296P3.86 kodhadhūmena vigatadhūmo .Evamettha suttante maggekaggatampi kathetvā gāthāya phalasamāpattiyeva kathitāti .