1. Paṭhamapārājikaṃ

656. TenaT0.1P4.211M0.273V0.284 samayena buddho bhagavā sāvatthiyaṃ viharati jetavane anāthapiṇḍikassa ārāme .

Tena kho pana samayena sāḷho migāranattā bhikkhunisaṅghassa vihāraṃ kattukāmo hoti .

Atha kho sāḷho migāranattā bhikkhuniyo upasaṅkamitvā etadavoca –

‘‘ icchāmahaṃ , ayye , bhikkhunisaṅghassa vihāraṃ kātuṃ .

Detha me navakammikaṃ bhikkhunin ’’ ti .

Tena kho pana samayena catasso bhaginiyo bhikkhunīsu pabbajitā honti – nandā , nandavatī , sundarīnandā , thullanandāti .

Tāsu sundarīnandā bhikkhunī taruṇapabbajitā abhirūpā hoti dassanīyā pāsādikā paṇḍitā byattā medhāvinī dakkhā analasā , tatrupāyāya vīmaṃsāya samannāgatā , alaṃ kātuṃ alaṃ saṃvidhātuṃ .

Atha kho bhikkhunisaṅgho sundarīnandaṃ bhikkhuniṃ sammannitvā sāḷhassa migāranattuno navakammikaṃ adāsi .

Tena kho pana samayena sundarīnandā bhikkhunī sāḷhassaV0.285 migāranattuno nivesanaṃ abhikkhaṇaṃ gacchati –

‘‘ vāsiṃ detha , parasuṃ [ pharasuṃ ( syā . ka .)] detha , kuṭhāriṃ [ kudhāriṃ ( ka .)] detha , kuddālaṃ detha , nikhādanaṃ dethā ’’ ti .

Sāḷhopi migāranattā bhikkhunupassayaṃ abhikkhaṇaṃT0.2 gacchati katākataṃ jānituṃ .

Te abhiṇhadassanena paṭibaddhacittā ahesuṃ .

Atha kho sāḷho migāranattā sundarīnandaṃ bhikkhuniṃ dūsetuṃ okāsaṃ alabhamāno etadevatthāya bhikkhunisaṅghassa bhattaṃ akāsi .

Atha kho sāḷho migāranattā bhattagge āsanaṃ paññapento –

‘‘ ettakā bhikkhuniyo ayyāya sundarīnandāya vuḍḍhatarā ’’ ti ekamantaṃ āsanaṃ paññapesi ‘‘ ettakā navakatarā ’’ ti – ekamantaṃ āsanaṃ paññapesi .

Paṭicchanne okāseM0.274 nikūṭe sundarīnandāya bhikkhuniyāP4.212 āsanaṃ paññapesi , yathā therā bhikkhuniyo jāneyyuṃ –

‘‘ navakānaṃ bhikkhunīnaṃ santike nisinnā ’’ ti ;

navakāpi bhikkhuniyo jāneyyuṃ –

‘‘ therānaṃ bhikkhunīnaṃ santike nisinnā ’’ ti .

Atha kho sāḷho migāranattā bhikkhunisaṅghassa kālaṃ ārocāpesi –

‘‘ kālo , ayye , niṭṭhitaṃ bhattan ’’ ti .

Sundarīnandā bhikkhunī sallakkhetvā –

‘‘ na bahukato sāḷho migāranattā bhikkhunisaṅghassa bhattaṃ akāsi ;

maṃ so dūsetukāmo .

Sacāhaṃ gamissāmi vissaro me bhavissatī ’’ ti , antevāsiniṃ bhikkhuniṃ āṇāpesi –

‘‘ gaccha me piṇḍapātaṃ nīhara .

Yo ce maṃ pucchati ,‘ gilānā ’ ti paṭivedehī ’’ ti .

‘‘ Evaṃ , ayye ’’ ti kho sā bhikkhunī sundarīnandāya bhikkhuniyā paccassosi .

Tena kho pana samayena sāḷho migāranattā bahidvārakoṭṭhake ṭhito hoti sundarīnandaṃ bhikkhuniṃ paṭipucchanto –

‘‘ kahaṃ , ayye , ayyā sundarīnandā ?

Kahaṃ , ayye , ayyā sundarīnandā ’’ ti ?

EvaṃT0.3 vutte sundarīnandāya bhikkhuniyā antevāsinī bhikkhunī sāḷhaṃ migāranattāraṃ etadavoca –

‘‘ gilānāvuso ;

piṇḍapātaṃ nīharissāmī ’’ ti .

Atha kho sāḷho migāranattā –

‘‘ yampāhaṃ atthāya [ yaṃpāhaṃ ( syā .)] bhikkhunisaṅghassa bhattaṃ akāsiṃ ayyāya sundarīnandāya kāraṇā ’’ ti manusse āṇāpetvā –

‘‘ bhikkhunisaṅghaṃ bhattena parivisathā ’’ ti vatvā yena bhikkhunupassayo tenupasaṅkami .

Tena kho pana samayena sundarīnandā bhikkhunī bahārāmakoṭṭhake ṭhitā hoti sāḷhaṃ migāranattāraṃ patimānentī .

Addasā kho sundarīnandā bhikkhunī sāḷhaṃ migāranattāraṃ dūratova āgacchantaṃ .

Disvāna upassayaṃ pavisitvā sasīsaṃ pārupitvā mañcake nipajji .

Atha kho sāḷho migāranattā yena sundarīnandā bhikkhunī tenupasaṅkami ;

upasaṅkamitvā sundarīnandaṃ bhikkhuniṃ etadavoca –

‘‘ kiṃ te , ayye , aphāsu , kissa nipannāsī ’’ ti ?

‘‘ Evañhetaṃ , āvuso , hoti yā anicchantaṃ icchatī ’’ ti .

‘‘ Kyāhaṃ taṃ , ayyeV0.286 , na icchissāmi ?

Api cāhaṃ okāsaṃ na labhāmi taṃ dūsetun ’’ ti .

Avassuto avassutāya sundarīnandāya bhikkhuniyā kāyasaṃsaggaṃ samāpajji .

Tena kho pana samayena aññatarā bhikkhunī jarādubbalā caraṇagilānā sundarīnandāya bhikkhuniyā avidūre nipannā hoti .

Addasā kho sā bhikkhunīM0.275 sāḷhaṃ migāranattāraṃ avassutaṃ avassutāya sundarīnandāya bhikkhuniyā kāyasaṃsaggaṃT0.4 samāpajjantaṃ .

Disvāna ujjhāyati khiyyati vipāceti –

‘‘ kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī ’’ tiP4.213 !

Atha kho sā bhikkhunī bhikkhunīnaṃ etamatthaṃ ārocesi .

Yā tā bhikkhuniyo appicchā santuṭṭhā lajjiniyo kukkuccikā sikkhākāmā tā ujjhāyanti khiyyanti vipācenti –

‘‘ kathañhi nāma ayyā sundarīnandā avassutā avassutassa purisapuggalassa kāyasaṃsaggaṃ sādiyissatī ’’ ti !

Atha kho tā bhikkhuniyo bhikkhūnaṃ etamatthaṃ ārocesuṃ .

Ye te bhikkhū appicchā santuṭṭhā lajjino kukkuccakā sikkhākāmā te ujjhāyanti khiyyanti vipācenti –

‘‘ kathañhi nāma sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissatī ’’ ti !

Atha kho te bhikkhū sundarīnandaṃ bhikkhuniṃ anekapariyāyena vigarahitvā bhagavato etamatthaṃ ārocesuṃ .

Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi –

‘‘ saccaṃ kira , bhikkhave , sundarīnandā bhikkhunī avassutā avassutassa purisapuggalassa kāyasaṃsaggaṃ sādiyatī ’’ ti [ sādiyīti ( ka .)]?

‘‘ Saccaṃ , bhagavā ’’ ti .

Vigarahi buddho bhagavā –

‘‘ ananucchavikaṃ , bhikkhave , sundarīnandāya bhikkhuniyā ananulomikaṃ appatirūpaṃ assāmaṇakaṃ akappiyaṃ akaraṇīyaṃ .

Kathañhi nāma , bhikkhave , sundarīnandā bhikkhunī avassutā avassutassa purisapuggalassa kāyasaṃsaggaṃ sādiyissati !

Netaṃ , bhikkhave , appasannānaṃ vā pasādāya pasannānaṃ vā bhiyyobhāvāya .

Atha khvetaṃ , bhikkhaveT0.5 , appasannānañceva appasādāya pasannānañca ekaccānaṃ aññathattāyā ’’ ti .

Atha kho bhagavā sundarīnandaṃ bhikkhuniṃ anekapariyāyena vigarahitvā dubbharatāya dupposatāya mahicchatāya asantuṭṭhitāya [ asantuṭṭhatāya ( syā .), asantuṭṭhiyā ( ka .)] saṅgaṇikāya kosajjassa avaṇṇaṃ bhāsitvā , anekapariyāyena subharatāya suposatāya appicchassa santuṭṭhassa [ santuṭṭhiyā ( ka .)] sallekhassa dhutassa pāsādikassa apacayassa vīriyārambhassa vaṇṇaṃ bhāsitvā , bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi –

‘‘ tena hi , bhikkhave , bhikkhunīnaṃ sikkhāpadaṃ paññapessāmi dasa atthavaseV0.287 paṭicca – saṅghasuṭṭhutāya , saṅghaphāsutāya , dummaṅkūnaṃ bhikkhunīnaṃ niggahāyaM0.276 , pesalānaṃ bhikkhunīnaṃ phāsuvihārāya , diṭṭhadhammikānaṃ āsavānaṃ saṃvarāya , samparāyikānaṃ āsavānaṃ paṭighātāya , appasannānaṃ pasādāya , pasannānaṃ bhiyyobhāvāya , saddhammaṭṭhitiyā vinayānuggahāya .

Evañca pana , bhikkhave , bhikkhuniyo imaṃ sikkhāpadaṃ uddisantu –

657.‘‘ Yā pana bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃ āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyeyya , ayampi pārājikā hoti asaṃvāsā ubbhajāṇumaṇḍalikā ’’ ti .

658. YāP4.214 panāti yā yādisā yathāyuttā yathājaccā yathānāmā yathāgottā yathāsīlā yathāvihārinī yathāgocarā therā vā navā vā majjhimā vā , esā vuccati yā panāti .

Bhikkhunīti bhikkhikāti bhikkhunī ;

bhikkhācariyaṃ ajjhupagatāti bhikkhunī ;

bhinnapaṭadharāti bhikkhunīT0.6 ;

samaññāya bhikkhunī ;

paṭiññāya bhikkhunī ;

ehi bhikkhunīti bhikkhunī ;

tīhi saraṇagamanehi upasampannāti bhikkhunī ;

bhadrā bhikkhunī ;

sārā bhikkhunī ;

sekhā bhikkhunī ;

asekhā bhikkhunī ;

samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī .

Tatra yāyaṃ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā , ayaṃ imasmiṃ atthe adhippetā bhikkhunīti .

Avassutā nāma sārattā apekkhavatī paṭibaddhacittā .

Avassuto nāma sāratto apekkhavā paṭibaddhacitto .

Purisapuggalo nāma manussapuriso na yakkho na peto na tiracchānagato viññū paṭibalo kāyasaṃsaggaṃ samāpajjituṃ .

Adhakkhakan ti heṭṭhakkhakaṃ .

Ubbhajāṇumaṇḍalan ti uparijāṇumaṇḍalaṃ .

ĀmasanaṃV0.288 nāma āmaṭṭhamattaṃ .

Parāmasanaṃ nāma itocito ca sañcopanaṃ .

Gahaṇaṃ nāma gahitamattaṃ .

Chupanaṃ nāma phuṭṭhamattaṃ .

PaṭipīḷanaṃM0.277 vā sādiyeyyāti aṅgaṃ gahetvā nippīḷanaṃ sādiyati .

Ayampīti purimāyo upādāya vuccati .

Pārājikā hotīti seyyathāpi nāma puriso sīsacchinno abhabbo tena sarīrabandhanena jīvituṃ , evameva bhikkhunī avassutā avassutassa purisapuggalassa adhakkhakaṃ ubbhajāṇumaṇḍalaṃT0.7 āmasanaṃ vā parāmasanaṃ vā gahaṇaṃ vā chupanaṃ vā paṭipīḷanaṃ vā sādiyantī assamaṇī hoti asakyadhītā .

Tena vuccati pārājikā hotīti .

Asaṃvāsāti saṃvāso nāma ekakammaṃ ekuddeso samasikkhatā , eso saṃvāso nāma .

So tāya saddhiṃ natthi , tena vuccati asaṃvāsāti .

659. Ubhatoavassute adhakkhakaṃ ubbhajāṇumaṇḍalaṃ kāyena kāyaṃ āmasati , āpatti pārājikassa .

Kāyena kāyapaṭibaddhaṃ āmasati , āpatti thullaccayassa .

Kāyapaṭibaddhena kāyaṃ āmasati , āpatti thullaccayassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasatiP4.215 , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

Ubbhakkhakaṃ adhojāṇumaṇḍalaṃ kāyena kāyaṃ āmasati , āpatti thullaccayassa .

Kāyena kāyapaṭibaddhaṃV0.289 āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

660. Ekatoavassute adhakkhakaṃ ubbhajāṇumaṇḍalaṃ kāyena kāyaṃ āmasatiT0.8 , āpatti thullaccayassa .

Kāyena kāyapaṭibaddhaṃ āmasatiM0.278 , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

Ubbhakkhakaṃ adhojāṇumaṇḍalaṃ kāyena kāyaṃ āmasati , āpatti dukkaṭassa .

Kāyena kāyapaṭibaddhaṃ āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

661. Ubhatoavassute yakkhassa vā petassa vā paṇḍakassa vā tiracchānagatamanussaviggahassa vā adhakkhakaṃ ubbhajāṇumaṇḍalaṃ kāyena kāyaṃ āmasati , āpatti thullaccayassa .

Kāyena kāyapaṭibaddhaṃ āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

NissaggiyenaT0.9 nissaggiyaṃ āmasati , āpatti dukkaṭassa .

UbbhakkhakaṃV0.290 adhojāṇumaṇḍalaṃ kāyena kāyaṃ āmasati , āpatti dukkaṭassa .

Kāyena kāyapaṭibaddhaṃ āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

662. EkatoavassuteM0.279 adhakkhakaṃ ubbhajāṇumaṇḍalaṃ kāyena kāyaṃ āmasati , āpatti dukkaṭassa .

Kāyena kāyapaṭibaddhaṃ āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃ āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

Ubbhakkhakaṃ adhojāṇumaṇḍalaṃ kāyena kāyaṃ āmasati , āpatti dukkaṭassa .

Kāyena kāyapaṭibaddhaṃ āmasati , āpatti dukkaṭassa .

Kāyapaṭibaddhena kāyaṃ āmasati , āpatti dukkaṭassa .

Kāyapaṭibaddhena kāyapaṭibaddhaṃ āmasati , āpatti dukkaṭassa .

Nissaggiyena kāyaṃ āmasati , āpatti dukkaṭassa .

Nissaggiyena kāyapaṭibaddhaṃT0.10 āmasati , āpatti dukkaṭassa .

Nissaggiyena nissaggiyaṃ āmasati , āpatti dukkaṭassa .

663. Anāpatti asañcicca , assatiyā , ajānantiyā , asādiyantiyā , ummattikāya , khittacittāya , vedanāṭṭāya , ādikammikāyāti .

Paṭhamapārājikaṃ samattaṃ [ bhikkhunivibhaṅge sikkhāpadagaṇanā bhikkhūhi § asādhāraṇavasena pakāsitāti veditabbā ].

Issues

Select Version

Bhikkhunīvibhaṅgo

Bhikkhunīvibhaṅgo