7. Sattamasikkhāpadaṃ
763. Tena
M0.329 samayena buddho bhagavā sāvatthiyaṃ viharati jetavane anāthapiṇḍikassa ārāme .Tena kho pana samayena upāsakā bhikkhunisaṅghassa cīvaratthāya chandakaṃ saṅgharitvā aññatarassa pāvārikassa ghare parikkhāraṃ nikkhipitvā
P4.252 bhikkhuniyo upasaṅkamitvā etadavocuṃ –‘‘ amukassa , ayye , pāvārikassa ghare cīvaratthāya parikkhāro nikkhitto , tato cīvaraṃ āharāpetvā bhājethā ’’ ti .
Bhikkhuniyo tena ca parikkhārena sayampi yācitvā bhesajjaṃ cetāpetvā paribhuñjiṃsu .
Upāsakā jānitvā ujjhāyanti khiyyanti vipācenti –
‘‘ kathañhi nāma bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpessantī ’’ ti … pe … saccaṃ kira , bhikkhave , bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpentīti ?
‘‘ Saccaṃ , bhagavā ’’ ti .
Vigarahi
T0.81 buddho bhagavā … pe … kathañhi nāma , bhikkhave , bhikkhuniyo aññadatthikena parikkhārena aññuddisikena saṅghikena saññācikena aññaṃ cetāpessanti !Netaṃ , bhikkhave , appasannānaṃ vā pasādāya … pe … evañca pana , bhikkhave , bhikkhuniyo imaṃ sikkhāpadaṃ uddisantu –
764.‘‘ Yā pana bhikkhunī aññadatthikena parikkhārena aññuddisikena saṅghikena saññācikena aññaṃ cetāpeyya , nissaggiyaṃ pācittiyan ’’ ti .
765. Yā panāti yā yādisā … pe … bhikkhunīti … pe … ayaṃ imasmiṃ atthe adhippetā bhikkhunīti .
Aññadatthikena
V0.342 parikkhārena aññuddisikenāti aññassatthāya dinnena .Saṅghikenāti saṅghassa , na gaṇassa , na ekabhikkhuniyā .
Saññācikenāti sayaṃ yācitvā .
Aññaṃ cetāpeyyāti yaṃatthāya dinnaṃ taṃ ṭhapetvā aññaṃ cetāpeti , payoge dukkaṭaṃ .
Paṭilābhena nissaggiyaṃ hoti .
Nissajjitabbaṃ saṅghassa vā gaṇassa vā ekabhikkhuniyā vā .
Evañca pana , bhikkhave , nissajjitabbaṃ … pe …‘‘ idaṃ me , ayye , aññadatthikena parikkhārena aññuddisikena
M0.330 saṅghikena saññācikena aññaṃ cetāpitaṃ nissaggiyaṃ , imāhaṃ saṅghassa nissajjāmī ’’ ti … pe … dadeyyāti … pe … dadeyyunti … pe … ayyāya dammīti . 766. Aññadatthike aññadatthikasaññā aññaṃ cetāpeti , nissaggiyaṃ pācittiyaṃ .
Aññadatthike vematikā aññaṃ cetāpeti , nissaggiyaṃ pācittiyaṃ .
Aññadatthike anaññadatthikasaññā aññaṃ cetāpeti
T0.82 , nissaggiyaṃ pācittiyaṃ .Nissaṭṭhaṃ paṭilabhitvā yathādāne upanetabbaṃ .
Anaññadatthike aññadatthikasaññā , āpatti dukkaṭassa .
Anaññadatthike vematikā , āpatti dukkaṭassa .
Anaññadatthike anaññadatthikasaññā , anāpatti .
767. Anāpatti sesakaṃ upaneti , sāmike apaloketvā upaneti , āpadāsu , ummattikāya , ādikammikāyāti .
Sattamasikkhāpadaṃ niṭṭhitaṃ .