9. Navamasikkhāpadaṃ
1058. Tena samayena buddho bhagavā sāvatthiyaṃ viharati jetavane anāthapiṇḍikassa ārāme .
Tena kho pana samayena bhikkhuniyo uposathampi na pucchanti ovādampi na yācanti .
Bhikkhū ujjhāyanti khiyyanti vipācenti –
‘‘ kathañhi nāma bhikkhuniyo uposathampi na pucchissanti ovādampi na yācissantī ’’ ti … pe … saccaṃ kira , bhikkhave , bhikkhuniyo ‘‘ uposathampi na pucchanti ovādampi na yācantī ’’ ti ?
‘‘ Saccaṃ , bhagavā ’’ ti .
Vigarahi buddho bhagavā … pe … kathañhi nāma , bhikkhave , bhikkhuniyo uposathampi na pucchissanti ovādampi na yācissanti !
Netaṃ , bhikkhave , appasannānaṃ vā pasādāya … pe … evañca pana , bhikkhave , bhikkhuniyo imaṃ sikkhāpadaṃ uddisantu –
1059.‘‘ Anvaddhamāsaṃ bhikkhuniyā bhikkhusaṅghato dve dhammā paccāsīsitabbā
T0.194 – uposathapucchakañca ovādūpasaṅkamanañca .Taṃ atikkāmentiyā pācittiyan ’’ ti .
1060. Anvaddhamāsan ti
M0.415 anuposathikaṃ .Uposatho nāma dve uposathā – cātuddasiko ca pannarasiko ca .
Ovādo
V0.431 nāma aṭṭha garudhammā .‘‘ Uposathampi na pucchissāmi ovādampi na yācissāmī ’’ ti dhuraṃ nikkhittamatte āpatti pācittiyassa .
1061. Anāpatti sati antarāye , pariyesitvā dutiyikaṃ bhikkhuniṃ na labhati , gilānāya , āpadāsu , ummattikāya , ādikammikāyāti .
Navamasikkhāpadaṃ niṭṭhitaṃ .