5. Pañcamasikkhāpadaṃ
1090. Tena samayena buddho bhagavā sāvatthiyaṃ viharati jetavane anāthapiṇḍikassa ārāme
V0.440 .Tena kho pana samayena bhikkhuniyo ūnadvādasavassaṃ gihigataṃ vuṭṭhāpenti .
Tā akkhamā honti sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ .
Uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ anadhivāsakajātikā honti .
Yā tā bhikkhuniyo appicchā … pe … tā ujjhāyanti khiyyanti vipācenti –
‘‘ kathañhi nāma bhikkhuniyo ūnadvādasavassaṃ
T0.206 gihigataṃ vuṭṭhāpessantī ’’ ti … pe … saccaṃ kira , bhikkhave , bhikkhuniyo ūnadvādasavassaṃ gihigataṃ vuṭṭhāpentīti ?‘‘ Saccaṃ , bhagavā ’’ ti .
Vigarahi
M0.424 buddho bhagavā … pe … kathañhiP4.322 nāma , bhikkhave , bhikkhuniyo ūnadvādasavassaṃ gihigataṃ vuṭṭhāpessanti !Ūnadvādasavassā [ ūnadvādasavassāhi ( ka .)], bhikkhave , gihigatā akkhamā hoti sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ .
Uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ anadhivāsakajātikā hoti .
Dvādasavassāva [ dvādasavassā ca ( syā . ka .)] kho , bhikkhave , gihigatā khamā hoti sītassa uṇhassa jighacchāya pipāsāya ḍaṃsamakasavātātapasarīsapasamphassānaṃ duruttānaṃ durāgatānaṃ vacanapathānaṃ .
Uppannānaṃ sārīrikānaṃ vedanānaṃ dukkhānaṃ tibbānaṃ kharānaṃ kaṭukānaṃ asātānaṃ amanāpānaṃ pāṇaharānaṃ adhivāsakajātikā hoti .
Netaṃ , bhikkhave , appasannānaṃ vā pasādāya … pe … evañca pana , bhikkhave , bhikkhuniyo imaṃ sikkhāpadaṃ uddisantu –
1091.‘‘ Yā pana bhikkhunī ūnadvādasavassaṃ gihigataṃ vuṭṭhāpeyya , pācittiyan ’’ ti .
1092. Yā panāti yā yādisā … pe … bhikkhunīti … pe … ayaṃ imasmiṃ atthe adhippetā bhikkhunīti .
Ūnadvādasavassā nāma appattadvādasavassā .
Gihigatā nāma purisantaragatā vuccati .
Vuṭṭhāpeyyāti upasampādeyya .
‘‘ Vuṭṭhāpessāmī ’’ ti gaṇaṃ vā ācariniṃ vā pattaṃ
T0.207 vā cīvaraṃ vā pariyesati , sīmaṃ vā sammannati , āpatti dukkaṭassa .Ñattiyā dukkaṭaṃ .
Dvīhi kammavācāhi dukkaṭā .
Kammavācāpariyosāne upajjhāyāya āpatti pācittiyassa .
Gaṇassa ca ācariniyā ca āpatti dukkaṭassa .
1093. Ūnadvādasavassāya
V0.441 ūnadvādasavassasaññā vuṭṭhāpeti , āpatti pācittiyassa .Ūnadvādasavassāya vematikā vuṭṭhāpeti , āpatti dukkaṭassa .
Ūnadvādasavassāya paripuṇṇasaññā vuṭṭhāpeti , anāpatti .
Paripuṇṇadvādasavassāya
M0.425 ūnadvādasavassasaññā , āpatti dukkaṭassa .Paripuṇṇadvādasavassāya vematikā , āpatti dukkaṭassa .
Paripuṇṇadvādasavassāya paripuṇṇasaññā , anāpatti .
1094. Anāpatti ūnadvādasavassaṃ paripuṇṇasaññā vuṭṭhāpeti , paripuṇṇadvādasavassaṃ paripuṇṇasaññā vuṭṭhāpeti , ummattikāya , ādikammikāyāti .
Pañcamasikkhāpadaṃ niṭṭhitaṃ .