7. Catukkanayasaṃsandanavaṇṇanā
46-52.
Ekadhammatopi
M0.57 aññattaṃ anicchanto rūpādiekekadhammavasena nānuyuñjitabbo .Samudāyato hi ayaṃ aññattaṃ anicchanto ekadesato anaññattaṃ paṭikkhipanto na niggahāraho siyāti etaṃ vacanokāsaṃ nivattetuṃ ‘‘ ayañca anuyogo ’’ tiādimāha .
Sakalan ti sattapaññāsavidho dhammappabhedo puggaloti vā paramatthasaccaṃ puggaloti vā evaṃ sakalaṃ sandhāyāti attho .
Evaṃ sakalaṃ paramatthaṃ cintetvā tantivasena anuyogalakkhaṇassa ṭhapitattā sakalaparamatthato ca aññassa saccikaṭṭhassa abhāvā saccikaṭṭhena puggalena tato aññena na bhavitabbanti ‘‘ rūpaṃ puggalo ’’ ti imaṃ pañhaṃ paṭikkhipantassa niggahāropanaṃ yuttanti attho .
Sabhāgavinibbhogatoti rūpato aññasabhāgattāti vuttaṃ hoti .
Sabbadhammāti rūpavajje sabbadhamme vadati .
‘‘ Rūpasmiṃ puggalo ’’ ti ettha nissayavināse vināsāpattibhayena paṭikkhipatīti adhippāyenāha ‘‘ ucchedadiṭṭhibhayena cevā ’’ ti .
Tīsu pana samayavirodhena paṭikkhepo adhippeto .
Na hi so sakkāyadiṭṭhiṃ icchati , apica sassatadiṭṭhibhayena paṭikkhipatīti yuttaṃ vattuṃ .
Sakkāyadiṭṭhīsu
V0.57 hi pañceva ucchedadiṭṭhiyo , sesāsassatadiṭṭhiyoti .Aññatra rūpāti ettha ca rūpavā puggaloti ayamattho saṅgahitoti veditabbo .
Catukkanayasaṃsandanavaṇṇanā niṭṭhitā .
Niṭṭhitā ca saṃsandanakathāvaṇṇanā .