13. Terasamavaggo
1. Kappaṭṭhakathāvaṇṇanā
654-657.
Kappaṭṭhakathāyaṃ
M0.99V0.105 heṭṭhāti iddhibalakathāyaṃ .Kappaṭṭhakathāvaṇṇanā niṭṭhitā .
3. Anantarāpayuttakathāvaṇṇanā
660-662.
Anantarāpayuttakathāyaṃ ānantariyaṃ payuttaṃ etenāti anantarāpayuttoti ānantariye anantarāsaddaṃ āropetvā aṭṭhakathāyaṃ attho vuttoti daṭṭhabbo .
‘‘ Anantarapayutto ’’ tipi pāḷi dissati .
Anantarāpayuttakathāvaṇṇanā niṭṭhitā .
4. Niyatassaniyāmakathāvaṇṇanā
663-664.
Sesā tebhūmakadhammā aniyatā nāmāti ettha appattaniyāmānaṃ dhamme sandhāya ‘‘ tebhūmakadhammā ’’ ti āha .
Eteva hi sandhāya ‘‘ tehi samannāgatopi aniyatoyevā ’’ ti vuttanti .
Iti imaṃ vohāramattaṃ gahetvā ‘‘ niyato bodhisatto pacchimabhaviko bhabbo dhammaṃ abhisametuṃ okkamitun ’’ ti adhippāyena ‘‘ niyāmaṃ okkamatī ’’ ti yesaṃ laddhīti atthayojanā .
Evaṃ pana vohāramattasabbhāvo ‘‘ niyato ’’ ti vacanassa , dhammaṃ abhisametuṃ bhabbatā ca ‘‘ niyāmaṃ okkamatī ’’ ti
V0.106 vacanassa kāraṇabhāvena vuttā hoti , bhabbatāyeva pana ubhayassapi kāraṇanti yuttaṃ .Aññenāti yadi niyato niyāmaṃ okkameyya , micchattaniyato sammattaniyāmaṃ , sammattaniyato vā micchattaniyāmaṃ okkameyya , na ca taṃ atthīti dassanatthanti attho .
Niyatassaniyāmakathāvaṇṇanā niṭṭhitā .
8. Asātarāgakathāvaṇṇanā
674. Asātarāgakathāyaṃ
M0.100 ‘‘ aho vata me etadeva bhaveyyā ’’ ti rajjanāti iminā evaṃ pavattamānoyeva lobho idha ‘‘ rāgo ’’ ti adhippeto , na aññathāti dasseti . 675. Sutte panāti etassa ‘‘ adhippāyo ’’ ti etena sambandho .
Asātarāgakathāvaṇṇanā niṭṭhitā .
9. Dhammataṇhāabyākatātikathāvaṇṇanā
676-680.
Yasmā dhammataṇhāti vuttā , tasmā abyākatāti kusalesu dhammesu lokuttaresu vā sabbesu taṇhā ‘‘ dhammataṇhā ’’ ti gahetvā yasmā sā taṇhā , tasmā kusalā na hoti , yasmā pana dhamme pavattā , tasmā akusalā na hotīti abyākatāti laddhīti dasseti .
Tīhi koṭṭhāsehi chapi taṇhā saṃkhipitvā dassitā , tasmā dhammataṇhāpi kāmataṇhādibhāvato na abyākatāti adhippāyo .
Dhammataṇhāabyākatātikathāvaṇṇanā niṭṭhitā .
Terasamavaggavaṇṇanā niṭṭhitā .