Issues
Select Version
Theragāthāpāḷi
Theragāthāpāḷi

3. Mahāpanthakattheragāthā

Author: _System_Pali_VRI_ @ Administrator

3. Mahāpanthakattheragāthā

510.
‘‘ Yadā paṭhamamaddakkhiṃ , satthāramakutobhayaṃ ;
Tato me ahu saṃvego , passitvā purisuttamaṃ .
511.
‘‘ Siriṃ hatthehi pādehi , yo paṇāmeyya āgataṃ ;
Etādisaṃ so satthāraṃ , ārādhetvā virādhaye .
512.
‘‘ Tadāhaṃ puttadārañca , dhanadhaññañca chaḍḍayiṃ ;
Kesamassūni chedetvā , pabbajiṃ anagāriyaṃ .
513.
‘‘ Sikkhāsājīvasampanno , indriyesu susaṃvuto ;
Namassamāno sambuddhaṃ , vihāsiṃ aparājito .
514.
‘‘ Tato me paṇidhī āsi , cetaso abhipatthito ;
Na nisīde muhuttampi , taṇhāsalle anūhate .
515.
‘‘ Tassa mevaṃ viharato , passa vīriyaparakkamaṃ ;
Tisso vijjā anuppattā , kataṃ buddhassa sāsanaṃ .
516.
‘‘ PubbenivāsaṃM0.297 jānāmi , dibbacakkhu visodhitaṃ ;
Arahā dakkhiṇeyyomhi , vippamutto nirūpadhi .
517.
‘‘ TatoT0.344V0.234 ratyā vivasāne [ vivasane ( sī . syā .)], sūriyassuggamanaṃ pati ;
Sabbaṃ taṇhaṃ visosetvā , pallaṅkena upāvisin ’’ ti .
… Mahāpanthako thero ….
Aṭṭhakanipāto niṭṭhito .
Tatruddānaṃ –
Mahākaccāyano thero , sirimitto mahāpanthako ;
Ete aṭṭhanipātamhi , gāthāyo catuvīsatīti .