Issues
Select Version
Theragāthāpāḷi
Theragāthāpāḷi

4. Catutthavaggo

Author: _System_Pali_VRI_ @ Administrator

4. Catutthavaggo

1. Migasirattheragāthā

181.
‘‘ YatoP0.24 ahaṃ pabbajito , sammāsambuddhasāsane ;
Vimuccamāno uggacchiṃ , kāmadhātuṃ upaccagaṃ .
182.
‘‘ BrahmunoT0.297V0.197 pekkhamānassa , tato cittaṃ vimucci me ;
Akuppā me vimuttīti , sabbasaṃyojanakkhayā ’’ ti .
… Migasiro thero ….

2. Sivakattheragāthā

183.
‘‘ AniccāniM0.256 gahakāni , tattha tattha punappunaṃ ;
Gahakāraṃ [ gahakārakaṃ ( sī . pī .)] gavesanto , dukkhā jāti punappunaṃ .
184.
‘‘ Gahakāraka diṭṭhosi , puna gehaṃ na kāhasi ;
Sabbā te phāsukā bhaggā , thūṇikā [ thūṇirā ( pī . ka .), dhuṇirā ( syā .)] ca vidālitā [ padālitā ( sī . syā .)];
Vimariyādikataṃ cittaṃ , idheva vidhamissatī ’’ ti .
… Sivako [ sīvako ( sī .)] thero ….

3. Upavāṇattheragāthā

185.
‘‘ Arahaṃ sugato loke , vātehābādhito [… bādhito ( ka .)] muni ;
Sace uṇhodakaṃ atthi , munino dehi brāhmaṇa .
186.
‘‘ Pūjito pūjaneyyānaṃ [ pūjanīyānaṃ ( sī .)], sakkareyyāna sakkato ;
Apacitopaceyyānaṃ [ apacanīyānaṃ ( sī .), apacineyyānaṃ ( syā .)], tassa icchāmi hātave ’’ ti .
… Upavāṇo thero ….

4. Isidinnattheragāthā

187.
‘‘ Diṭṭhā mayā dhammadharā upāsakā , kāmā aniccā iti bhāsamānā ;
Sārattarattā maṇikuṇḍalesu , puttesu dāresu ca te apekkhā .
188.
‘‘ Addhā na jānanti yatodha dhammaṃ , kāmāT0.298 aniccā iti cāpi āhu ;
Rāgañca tesaṃ na balatthi chettuṃ , tasmā sitā puttadāraṃ dhanañcā ’’ ti .
… Isidinno thero ….

5. Sambulakaccānattheragāthā

189.
‘‘ DevoM0.257 ca vassati devo ca gaḷagaḷāyati ,
Ekako cāhaṃ bherave bile viharāmi ;
Tassa mayhaṃ ekakassa bherave bile viharato ,
Natthi bhayaṃ vā chambhitattaṃ vā lomahaṃso vā .
190.
‘‘ DhammatāV0.198 mamasā yassa me , ekakassa bherave bile ;
Viharato natthi bhayaṃ vā , chambhitattaṃ vā lomahaṃso vā ’’ ti .
… Sambulakaccāno [ sambahulakaccāno ( ka .)] thero ….

6. Nitakattheragāthā

191.
[ udā .34 udānepi ]‘‘ KassaP0.25 selūpamaṃ cittaṃ , ṭhitaṃ nānupakampati ;
Virattaṃ rajanīyesu , kuppanīye na kuppati ;
Yassevaṃ bhāvitaṃ cittaṃ , kuto taṃ dukkhamessati .
192.
‘‘ Mama selūpamaṃ cittaṃ , ṭhitaṃ nānupakampati ;
Virattaṃ rajanīyesu , kuppanīye na kuppati ;
Mamevaṃ bhāvitaṃ cittaṃ , kuto maṃ dukkhamessatī ’’ ti .
… Nitako [ khitako ( sī . syā .)] thero ….

7. Soṇapoṭiriyattheragāthā

193.
‘‘ Na tāva supituṃ hoti , ratti nakkhattamālinī ;
Paṭijaggitumevesā , ratti hoti vijānatā .
194.
‘‘ HatthikkhandhāvapatitaṃT0.299 , kuñjaro ce anukkame ;
Saṅgāme me mataṃ seyyo , yañce jīve parājito ’’ ti .
… Soṇo poṭiriyo [ selissariyo ( sī .), poṭṭiriyaputto ( syā .)] thero ….

8. Nisabhattheragāthā

195.
‘‘ PañcaM0.258 kāmaguṇe hitvā , piyarūpe manorame ;
Saddhāya gharā nikkhamma , dukkhassantakaro bhave .
196.
‘‘ Nābhinandāmi maraṇaṃ , nābhinandāmi jīvitaṃ ;
Kālañca paṭikaṅkhāmi , sampajāno patissato ’’ ti .
… Nisabho thero ….

9. Usabhattheragāthā

197.
‘‘ Ambapallavasaṅkāsaṃ , aṃse katvāna cīvaraṃ ;
Nisinno hatthigīvāyaṃ , gāmaṃ piṇḍāya pāvisiṃ .
198.
‘‘ HatthikkhandhatoV0.199 oruyha , saṃvegaṃ alabhiṃ tadā ;
Sohaṃ ditto tadā santo , patto me āsavakkhayo ’’ ti .
… Usabho thero ….

10. Kappaṭakurattheragāthā

199.
‘‘ Ayamiti kappaṭo kappaṭakuro , acchāya atibharitāya [ atibhariyāya ( sī . ka .), accaṃ bharāya ( syā .)];
Amataghaṭikāyaṃ dhammakaṭamatto [ dhammakaṭapatto ( syā . ka . aṭṭha .), dhammakaṭamaggo ( sī . aṭṭha .)], katapadaṃ jhānāni ocetuṃ .
200.
‘‘ MāP0.26 kho tvaṃ kappaṭa pacālesi , mā tvaṃ upakaṇṇamhi tāḷessaṃ ;
NaT0.300 hi [ na vā ( ka .)] tvaṃ kappaṭa mattamaññāsi , saṅghamajjhamhi pacalāyamānoti .
… Kappaṭakuro thero ….
Vaggo catuttho niṭṭhito .
Tassuddānaṃ –
MigasiroM0.259 sivako ca , upavāno ca paṇḍito ;
Isidinno ca kaccāno , nitako ca mahāvasī ;
Poṭiriyaputto nisabho , usabho kappaṭakuroti .