Issues
Select Version
Theragāthāpāḷi
Theragāthāpāḷi

2. Pārāpariyattheragāthā

Author: _System_Pali_VRI_ @ Administrator

2. Pārāpariyattheragāthā

726.
‘‘ SamaṇassaT0.372 ahu cintā , pārāpariyassa bhikkhuno ;
Ekakassa nisinnassa , pavivittassa jhāyino .
727.
‘‘ Kimānupubbaṃ puriso , kiṃ vataṃ kiṃ samācāraṃ ;
Attano kiccakārīssa , na ca kañci viheṭhaye .
728.
‘‘ IndriyāniM0.322 manussānaṃ , hitāya ahitāya ca ;
Arakkhitāni ahitāya , rakkhitāni hitāya ca .
729.
‘‘ Indriyāneva sārakkhaṃ , indriyāni ca gopayaṃ ;
Attano kiccakārīssa , na ca kañci viheṭhaye .
730.
‘‘ CakkhundriyaṃV0.257 ce rūpesu , gacchantaṃ anivārayaṃ ;
Anādīnavadassāvī , so dukkhā na hi muccati .
731.
‘‘ Sotindriyaṃ ce saddesu , gacchantaṃ anivārayaṃ ;
Anādīnavadassāvī , so dukkhā na hi muccati .
732.
‘‘ AnissaraṇadassāvīP0.73 , gandhe ce paṭisevati ;
Na so muccati dukkhamhā , gandhesu adhimucchito .
733.
‘‘ Ambilaṃ madhuraggañca , tittakaggamanussaraṃ ;
Rasataṇhāya gadhito , hadayaṃ nāvabujjhati .
734.
‘‘ Subhānyappaṭikūlāni , phoṭṭhabbāni anussaraṃ ;
Ratto rāgādhikaraṇaṃ , vividhaṃ vindate dukhaṃ .
735.
‘‘ Manaṃ cetehi dhammehi , yo na sakkoti rakkhituṃ ;
TatoT0.373 naṃ dukkhamanveti , sabbehetehi pañcahi .
736.
‘‘ Pubbalohitasampuṇṇaṃ , bahussa kuṇapassa ca ;
Naravīrakataṃ vagguṃ , samuggamiva cittitaṃ .
737.
‘‘ Kaṭukaṃ madhurassādaṃ , piyanibandhanaṃ dukhaṃ ;
Khuraṃva madhunā littaṃ , ullihaṃ nāvabujjhati .
738.
‘‘ Itthirūpe itthisare , phoṭṭhabbepi ca itthiyā ;
Itthigandhesu sāratto , vividhaṃ vindate dukhaṃ .
739.
‘‘ Itthisotāni sabbāni , sandanti pañca pañcasu ;
Tesamāvaraṇaṃ kātuṃ , yo sakkoti vīriyavā .
740.
‘‘ So atthavā so dhammaṭṭho , so dakkho so vicakkhaṇo ;
Kareyya ramamānopi , kiccaṃ dhammatthasaṃhitaṃ .
741.
‘‘ AthoM0.323 sīdati saññuttaṃ , vajje kiccaṃ niratthakaṃ ;
‘ Na taṃ kiccan ’ ti maññitvā , appamatto vicakkhaṇo .
742.
‘‘ Yañca atthena saññuttaṃ , yā ca dhammagatā rati ;
Taṃ samādāya vattetha , sā hi ve uttamā rati .
743.
‘‘ Uccāvacehupāyehi , paresamabhijigīsati ;
Hantvā vadhitvā atha socayitvā , ālopati sāhasā yo paresaṃ .
744.
‘‘ Tacchanto āṇiyā āṇiṃ , nihanti balavā yathā ;
IndriyānindriyehevaT0.374 , nihanti kusalo tathā .
745.
‘‘ SaddhaṃV0.258 vīriyaṃ samādhiñca , satipaññañca bhāvayaṃ ;
Pañca pañcahi hantvāna , anīgho yāti brāhmaṇo .
746.
‘‘ So atthavā so dhammaṭṭho , katvā vākyānusāsaniṃ ;
Sabbena sabbaṃ buddhassa , so naro sukhamedhatī ’’ ti .
… Pārāpariyo thero ….