7. Sattamavaggo
1. Vappattheragāthā
61.
‘‘ Passati
V0.175 passo passantaṃ , apassantañca passati ;Apassanto apassantaṃ , passantañca na passatī ’’ ti .
… Vappo thero ….
2. Vajjiputtattheragāthā
62.
‘‘ Ekakā
P0.10 mayaṃ araññe viharāma , apaviddhaṃva vanasmiṃ dārukaṃ ;Tassa me bahukā pihayanti , nerayikā viya saggagāminan ’’ ti .
… Vajjiputto thero ….
3. Pakkhattheragāthā
63.
‘‘ Cutā
M0.234 patanti patitā , giddhā ca punarāgatā ;Kataṃ kiccaṃ rataṃ rammaṃ , sukhenanvāgataṃ sukhan ’’ ti .
… Pakkho thero ….
4. Vimalakoṇḍaññattheragāthā
64.
‘‘ Dumavhayāya uppanno , jāto paṇḍaraketunā ;
Ketuhā
T0.275 ketunāyeva , mahāketuṃ padhaṃsayī ’’ ti .… Vimalakoṇḍañño thero ….
5. Ukkhepakatavacchattheragāthā
65.
‘‘ Ukkhepakatavacchassa , saṅkalitaṃ bahūhi vassehi ;
Taṃ bhāsati gahaṭṭhānaṃ , sunisinno uḷārapāmojjo ’’ ti .
… Ukkhepakatavaccho thero ….
6. Meghiyattheragāthā
66.
‘‘ Anusāsi
V0.176 mahāvīro , sabbadhammāna pāragū ;Tassāhaṃ dhammaṃ sutvāna , vihāsiṃ santike sato ;
Tisso vijjā anuppattā , kataṃ buddhassa sāsanan ’’ ti .
… Meghiyo thero ….
7. Ekadhammasavanīyattheragāthā
67.
‘‘ Kilesā jhāpitā mayhaṃ , bhavā sabbe samūhatā ;
Vikkhīṇo jātisaṃsāro , natthi dāni punabbhavo ’’ ti .
… Ekadhammasavanīyo thero ….
8. Ekudāniyattheragāthā
68.
[ udā .37; pāci .153]‘‘ Adhicetaso appamajjato , munino monapathesu sikkhato ;
Sokā na bhavanti tādino , upasantassa sadā satīmato ’’ ti .
… Ekudāniyo thero ….
9. Channattheragāthā
69.
‘‘ Sutvāna
M0.235 dhammaṃ mahato mahārasaṃ , sabbaññutaññāṇavarena desitaṃ ;Maggaṃ papajjiṃ [ papajjaṃ ( ka .)] amatassa pattiyā , so yogakkhemassa pathassa kovido ’’ ti .
… Channo thero ….
10. Puṇṇattheragāthā
70.
‘‘ Sīlameva
T0.276P0.11 idha aggaṃ , paññavā pana uttamo ;Manussesu ca devesu , sīlapaññāṇato jayan ’’ ti .
… Puṇṇo thero ….
Vaggo sattamo niṭṭhito .
Tassuddānaṃ
V0.177 –Vappo ca vajjiputto ca , pakkho vimalakoṇḍañño ;
Ukkhepakatavaccho ca , meghiyo ekadhammiko ;
Ekudāniyachannā ca , puṇṇatthero mahabbaloti .