Issues
Select Version
Theragāthāpāḷi
Theragāthāpāḷi

6. Chaṭṭhavaggo

Author: _System_Pali_VRI_ @ Administrator

6. Chaṭṭhavaggo

1. Godhikattheragāthā

51.
‘‘ VassatiV0.173 devo yathā sugītaṃ , channā me kuṭikā sukhā nivātā ;
Cittaṃ susamāhitañca mayhaṃ , atha ce patthayasi pavassa devā ’’ ti .
… Godhiko thero ….

2. Subāhuttheragāthā

52.
‘‘ Vassati devo yathā sugītaṃ , channā me kuṭikā sukhā nivātā ;
Cittaṃ susamāhitañca kāye , atha ce patthayasi pavassa devā ’’ ti .
… Subāhutthero ….

3. Valliyattheragāthā

53.
‘‘ Vassati devo yathā sugītaṃ , channā me kuṭikā sukhā nivātā ;
Tassaṃ viharāmi appamatto , atha ce patthayasi pavassa devā ’’ ti .
… Valliyo thero ….

4. Uttiyattheragāthā

54.
‘‘ VassatiM0.232P0.9 devo yathā sugītaṃ , channā me kuṭikā sukhā nivātā ;
Tassaṃ viharāmi adutiyo , atha ce patthayasi pavassa devā ’’ ti .
… Uttiyo thero ….

5. Añjanavaniyattheragāthā

55.
‘‘ ĀsandiṃT0.273 kuṭikaṃ katvā , ogayha añjanaṃ vanaṃ ;
Tisso vijjā anuppattā , kataṃ buddhassa sāsanan ’’ ti .
… Añjanavaniyo thero ….

6. Kuṭivihārittheragāthā

56.
‘‘ KoV0.174 kuṭikāyaṃ bhikkhu kuṭikāyaṃ , vītarāgo susamāhitacitto ;
Evaṃ jānāhi āvuso , amoghā te kuṭikā katā ’’ ti .
… Kuṭivihāritthero ….

7. Dutiyakuṭivihārittheragāthā

57.
‘‘ Ayamāhu purāṇiyā kuṭi , aññaṃ patthayase navaṃ kuṭiṃ ;
Āsaṃ kuṭiyā virājaya , dukkhā bhikkhu puna navā kuṭī ’’ ti .
… Dutiyakuṭivihāritthero ….

8. Ramaṇīyakuṭikattheragāthā

58.
‘‘ Ramaṇīyā me kuṭikā , saddhādeyyā manoramā ;
Na me attho kumārīhi , yesaṃ attho tahiṃ gacchatha nāriyo ’’ ti .
… Ramaṇīyakuṭiko thero ….

9. Kosalavihārittheragāthā

59.
‘‘ SaddhāyāhaṃM0.233 pabbajito , araññe me kuṭikā katā ;
Appamatto ca ātāpī , sampajāno patissato ’’ ti [ paṭissatoti ( ka .)].
… Kosalavihāritthero ….

10. Sīvalittheragāthā

60.
‘‘ Te me ijjhiṃsu saṅkappā , yadattho pāvisiṃ kuṭiṃ ;
Vijjāvimuttiṃ paccesaṃ , mānānusayamujjahan ’’ ti .
… Sīvalitthero ….
Vaggo chaṭṭho niṭṭhito .
Tassuddānaṃ –
GodhikoT0.274 ca subāhu ca , valliyo uttiyo isi ;
Añjanavaniyo thero , duve kuṭivihārino ;
Ramaṇīyakuṭiko ca , kosalavhayasīvalīti .