Parimaṇḍalādilakkhaṇavaṇṇanā
222. Samaṃ jānātīti ‘‘ ayaṃ tārukkhasamo ayaṃ pokkharasātisamo ’’ ti evaṃ tena tena samaṃ jānāti .
Sāmaṃ jānātīti sayaṃ jānāti .
Purisaṃ jānātīti ‘‘ ayaṃ seṭṭhasammato ’’ ti purisaṃ jānāti .
Purisavisesaṃ jānātīti muggaṃ māsena samaṃ akatvā guṇavisiṭṭhassa visesaṃ jānāti .
Ayamidamarahatīti ayaṃ puriso idaṃ nāma dānasakkāraṃ arahati
M3.118 .
Purisavisesakaro ahosīti purisavisesaṃ ñatvā kārako ahosi .
Yo yaṃ arahati , tasseva taṃ adāsi .
Yo hi kahāpaṇārahassa aḍḍhaṃ deti , so parassa aḍḍhaṃ nāseti .
Yo dve kahāpaṇe deti , so attano kahāpaṇaṃ nāseti .
Tasmā idaṃ ubhayampi akatvā yo yaṃ arahati , tassa tadeva adāsi .Idha kammaṃ nāma dīgharattaṃ purisavisesaṃ ñatvā kataṃ samasaṅgahakammaṃ .
Kammasarikkhakaṃ nāma tadassa
V3.107 kammaṃ sadevako loko iminā kāraṇena jānātūti imāni dve lakkhaṇāni nibbattanti .
Lakkhaṇaṃ nāma idameva lakkhaṇadvayaṃ .
Dhanasampatti ānisaṃso .Saddhādhanan tiādīsu sampattipaṭilābhaṭṭhena saddhādīnaṃ dhanabhāvo veditabbo .
223. Tuliyāti tulayitvā .
Paṭivicayāti paṭivicinitvā .
Mahājanasaṅgāhakan ti mahājanasaṅgahaṇaṃ .
Samekkhamānoti samaṃ pekkhamāno .
Atinipuṇā
P3.936 manujāti atinipuṇā sukhumapaññā lakkhaṇapāṭhakamanussā .Bahuvividhā gihīnaṃ arahānīti bahū vividhāni gihīnaṃ anucchavikāni paṭilabhati .
Daharo susu kumāro ‘‘ ayaṃ daharo kumāro paṭilabhissatī ’’ ti byākaṃsu mahīpatissāti rañño .