4. Dutiyahatthakasuttavaṇṇanā
24. Catutthe
M3.223 pañcamattehi upāsakasatehīti sotāpannasakadāgāmīnaṃyeva ariyasāvakaupāsakānaṃ pañcahi satehi parivuto bhuttapātarāso gandhamālavilepenacuṇṇāni gahetvā yena bhagavā tenupasaṅkami .Saṅgahavatthūnīti saṅgaṇhanakāraṇāni .
Tehāhan ti tehi ahaṃ .
Taṃ dānena saṅgaṇhāmīti naṅgalabalibaddabhattabījādīni ceva gandhamālamūlādīni ca datvā saṅgaṇhāmi .
Peyyavajjenāti amma , tāta , bhātara , bhaginītiādikena kaṇṇasukhena mudukena piyavacanena saṅgaṇhāmi .
Atthacariyāyāti ‘‘ imassa dānena vā piyavacanena vā kiccaṃ natthi , atthacariyāya saṅgaṇhitabbayuttako
V3.222 ayan ’’ ti ñatvā uppannakiccanittharaṇasaṅkhātāya atthacariyāya saṅgaṇhāmi .Samānattatāyāti ‘‘ imassa dānādīhi kiccaṃ natthi , samānattatāya
P4.115 saṅgaṇhitabbo ayan ’’ ti ekato khādanapivananisajjādīhi attanā samānaṃ katvā saṅgaṇhāmi .Daliddassa kho no tathā sotabbaṃ maññantīti daliddassa kiñci dātuṃ vā kātuṃ vā asakkontassa , yathā daliddassa no tathā sotabbaṃ maññanti , mama pana sotabbaṃ maññanti , dinnovāde tiṭṭhanti , na me anusāsaniṃ atikkamitabbaṃ maññanti .
Yoni kho tyāyan ti upāyo kho te ayaṃ .
Imesu pana dvīsupi suttesu satthārā sīlacāgapaññā missakā kathitāti veditabbā .