6. Puññakiriyavatthusuttavaṇṇanā
36. Chaṭṭhe
M3.231 puññakiriyāni ca tāni tesaṃ tesaṃ ānisaṃsānaṃ vatthūni cāti puññakiriyavatthūni .Dānādīnañhi lakkhaṇe cittaṃ ṭhapetvā ‘‘ evarūpaṃ nāma amhehi dānaṃ dātabbaṃ , sīlaṃ rakkhitabbaṃ , bhāvanā bhāvetabbā ’’ ti sattā puññāni karonti .
Dānameva dānamayaṃ , dānacetanāsu vā purimacetanāto nipphannā sanniṭṭhāpakacetanā dānamayaṃ sīlādīhi sīlamayādīni viya .
Sesadvayesupi eseva nayo .
Parittaṃ kataṃ hotīti thokaṃ mandaṃ kataṃ hoti .
Nābhisambhotīti na nipphajjati .
Akataṃ hotīti bhāvanāyayogoyeva anāraddho hotīti attho .
Manussadobhagyan ti
P4.127 manussesu sampattirahitaṃ pañcavidhaṃ nīcakulaṃ .Upapajjatīti paṭisandhivasena upagacchati , tattha nibbattatīti attho .
Mattaso katan ti pamāṇena kataṃ , thokaṃ na bahu .
Manussasobhagyan ti manussesu subhagabhāvaṃ tividhakulasampattiṃ .
Adhimattan ti adhikappamāṇaṃ balavaṃ vā .
Adhigaṇhantīti abhibhavitvā gaṇhanti , visiṭṭhatarā jeṭṭhakā hontīti attho .