846. Pamādaniddese cittassa vossaggoti imesu ettakesu ṭhānesu satiyā aniggaṇhitvā cittassa vossajjanaṃ ; sativirahoti attho . Vossaggānuppadānan ti vossaggassa anuppadānaṃ ; punappunaṃ vissajjananti attho . Asakkaccakiriyatāti etesaṃ dānādīnaṃ kusaladhammānaṃ bhāvanāya puggalassa vā deyyadhammassa vā asakkaccakaraṇavasena asakkaccakiriyā . Satatabhāvo sātaccaṃ . Na satatabhāvo asātaccaṃ . Na sātaccakiriyatā asātaccakiriyatā . Anaṭṭhitakaraṇaṃ anaṭṭhitakiriyatā . Yathā nāma kakaṇṭako thokaṃ gantvā thokaṃ tiṭṭhati , na nirantaraṃ gacchati , evameva yo puggalo ekadivasaṃ dānaṃ vā datvā pūjaṃ vā katvā dhammaṃ vā sutvā samaṇadhammaṃ vā katvā puna cirassaṃ karoti , na nirantaraṃ pavatteti , tassa sāM0.451 kiriyā anaṭṭhitakiriyatāti vuccati . Olīnavuttitāti nirantarakaraṇasaṅkhātassa vipphārasseva abhāvena līnavuttitā . Nikkhittachandatāti kusalakiriyāya vīriyachandassa nikkhittabhāvo . Nikkhittadhuratāti vīriyadhurassa oropanaṃ , osakkitamānasatāti attho . Anadhiṭṭhānan tiP0.469 kusalakaraṇe patiṭṭhābhāvo . Ananuyogoti ananuyuñjanaṃ . Pamādoti pamajjanaṃ . Yo evarūpo pamādoti idaṃ atthapariyāyassa byañjanapariyāyassa ca pariyantābhāvato ākāradassanaṃ . Idaṃ vuttaṃ hoti – yvāyaṃ ādito paṭṭhāya dassito pamādo , yo aññopi evamākāro evaṃjātiko pamādo pamajjanākāravasena pamajjanā , pamajjitabhāvavasena pamajjitattanti saṅkhaṃ gato – ayaṃ vuccati pamādoti . Lakkhaṇato panesa pañcasu kāmaguṇesu sativossaggalakkhaṇo , tattheva satiyā vissaṭṭhākāro veditabbo .