875. Hīnassa seyyohamasmīti mānādayo dāsādīnaṃ uppajjanti .
Dāso hi ‘ mātito vā pitito vā ko mayā sadiso añño dāso
M0.469 nāma atthi ’ aññe jīvituṃ asakkontā kucchihetuV0.460 dāsā nāma jātā .
Ahaṃ pana paveṇīāgatattā seyyo ’ ti vā ‘ paveṇīāgatabhāvena ubhatosuddhikadāsattena asukadāsena nāma saddhiṃ kiṃ mayhaṃ nānākaraṇan ’ ti vā ‘ kucchivasenāhaṃ dāsabyaṃ upagato .
Mātāpitukoṭiyā pana me dāsaṭṭhānaṃ natthi .
Kiṃ dāso nāma ahan ’ ti vā ete māne karoti .
Yathā ca dāso evaṃ pukkusacaṇḍālādayopi ete māne karontiyeva .
Ettha ca ‘ seyyassa seyyohamasmī ’ ti uppannamānova yāthāvamāno , itare dve ayāthāvamānā .
Tathā ‘ sadisassa sadisohamasmī ’ ti ‘ hīnassa hīnohamasmī ’ ti uppannamānova yāthāvamāno , itare dve ayāthāvamānā .
Tattha yāthāvamānā arahattamaggavajjhā , ayāthāvamānā sotāpattimaggavajjhā .