868. Hīnamānaniddese omānaṃ jappetīti heṭṭhāmānaṃ pavatteti . Omānoti lāmako heṭṭhāmāno . Omaññanā omaññitattan ti ākārabhāvaniddeso . Hīḷanāti jātiādīhi attajigucchanā . Ohīḷanāti atirekato hīḷanā . Ohīḷitattan ti tasseva bhāvaniddeso . Attuññāti attānaṃ hīnaṃ katvā jānanā . Attāvaññāti attānaṃ avajānanā . Attaparibhavoti jātiādisampattināmameva jātāti attānaṃ paribhavitvā maññanā . Evamime tayo mānā puggalaṃ anissāya jātiādivatthuvaseneva kathitā . Tesu ekeko tiṇṇampi seyyasadisahīnānaṃ uppajjati . Tattha ‘ seyyohamasmī ’ ti māno seyyasseva yāthāvamāno , sesānaṃ ayāthāvamāno . ‘ Sadisohamasmī ’ tiV0.459 mānoM0.468 sadisasseva yāthāvamāno , sesānaṃ ayāthāvamāno . ‘ Hīnohamasmī ’ ti māno hīnasseva yāthāvamāno , sesānaṃ ayāthāvamāno .