3. Paṭhamadhammavihārīsuttavaṇṇanā
73. Tatiye divasaṃ atināmetīti divasaṃ atikkāmeti .
Riñcati paṭisallānan ti ekībhāvaṃ vissajjeti .
Desetīti katheti pakāseti .
Dhammapaññattiyāti
M3.33 dhammassa paññāpanāya .Dhammaṃ
P3.266 pariyāpuṇātīti navaṅgavasena catusaccadhammaṃ pariyāpuṇāti vaḷañjeti katheti .Na riñcati paṭisallānan ti ekībhāvaṃ na vissajjeti .
Anuyuñjati ajjhattaṃ cetosamathan ti niyakajjhatte cittasamādhiṃ āsevati bhāveti , samathakammaṭṭhāne yuttappayutto hoti .
Hitesināti hitaṃ esantena .
Anukampakenāti anukampamānena .
Anukampaṃ upādāyāti anukampaṃ cittena pariggahetvā , paṭiccātipi vuttaṃ hoti .
Kataṃ vo taṃ mayāti taṃ mayā ime pañca puggale desentena tumhākaṃ kataṃ .
Ettakameva hi anukampakassa satthu kiccaṃ yadidaṃ aviparītadhammadesanā , ito paraṃ pana paṭipatti nāma sāvakānaṃ kiccaṃ .
Tenāha – etāni bhikkhu rukkhamūlāni … pe … amhākaṃ anusāsanīti .
Tattha ca rukkhamūlānīti iminā rukkhamūlasenāsanaṃ dasseti .
Suññāgārānīti iminā janavivittaṭṭhānaṃ .
Ubhayenāpi ca yogānurūpaṃ senāsanamācikkhati , dāyajjaṃ niyyāteti .
Jhāyathāti ārammaṇūpanijjhānena aṭṭhatiṃsārammaṇāni , lakkhaṇūpanijjhānena ca aniccādito khandhāyatanādīni upanijjhāyatha , samathañca
V3.34 vipassanañca vaḍḍhethāti vuttaṃ hoti .Mā pamādatthāti mā pamajjittha .
Mā pacchā vippaṭisārino ahuvatthāti ye hi pubbe daharakāle ārogyakāle sattasappāyādisampattikāle satthu sammukhībhāvakāle ca yonisomanasikāravirahitā rattindivaṃ maṅkulabhattā hutvā seyyasukhamiddhasukhamanuyuttā pamajjanti , te pacchā jarākāle rogakāle maraṇakāle vipattikāle
P3.267 satthu parinibbānakāle ca taṃ pubbe pamādavihāraṃ anussarantā sappaṭisandhikālakiriyañca bhāriyaṃ sampassamānā vippaṭisārino honti .Tumhe pana tādisā mā ahuvatthāti etamatthaṃ dassento āha –
‘‘ mā pacchā vippaṭisārino ahuvatthā ’’ ti .
Ayaṃ vo amhākaṃ anusāsanīti ayaṃ amhākaṃ santikā ‘‘ jhāyatha mā pamādatthā ’’ ti tumhākaṃ anusāsanī , ovādoti vuttaṃ hoti .