27. Asaṃvāsaniddesavaṇṇanā
198. Ukkhittoti kammanānāsaṃvāsakasaṅkhāto āpattiyā adassane , appaṭikamme , pāpikāya diṭṭhiyā appaṭinissagge ukkhittako .
Anupasampannoti sikkhamānasāmaṇerasāmaṇerisikkhāpaccakkhātasaṅkhāto anupasampanno .
Chinnamūlakoti
M0.347 antimavatthuajjhāpanno .Ukkhittakesu ‘‘ dhammavādino ete ’’ ti uppannāya laddhiyā nānābhūto saṃvāso etassāti nānāsaṃvāso , ukkhittānuvattakasaṅkhāto laddhinānāsaṃvāsako .
Sīmato niggatā nissīmā , sīmantarikā bahisīmā ca , tattha hatthapāse cepi ṭhito , sīmānānāsaṃvāsako nissīmaṭṭhito .
Vehāyase ākāse ṭhito vehāyasaṇṭhito bindāgamena .
Tattha ‘‘ nānāsaṃvāso cā ’’ tiādinā samāhāradvandepi kvaci napuṃsakaliṅgaṃ byabhicaratīti napuṃsakattābhāvo yathā ‘‘ maggāmaggo ’’ ti .
Ekakammaṃ ekuddeso samasikkhatāti ayaṃ tividhopi saṃvāso nāma .
So yesaṃ natthi , te asaṃvāsā .
Ete hatthapāsato bahikaraṇavasena vajjetabbā .
Etesu hi tividhe ukkhittake sati uposathādikaṃ kammaṃ karontassa pācittiyaṃ , itaresu dukkaṭanti .
Asaṃvāsaniddesavaṇṇanā niṭṭhitā .