9. Padumattheraapadānavaṇṇanā
Catusaccaṃ pakāsentotiādikaṃ āyasmato padumattherassa apadānaṃ .
Ayampi purimabuddhesu katakusalasambhāro padumuttaramuninā
P0.383 dhammapajjote jotamāne ekasmiṃ kulagehe nibbatto gharāvāsaṃ saṇṭhapetvāM2.85 bhogasampannoti pākaṭo .So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi , sadhajaṃ taṃ padumakalāpaṃ ākāsamukkhipiṃ , taṃ
V2.78 acchariyaṃ disvā ativiya somanassajāto ahosi .So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo .
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha .
Tattha saccan ti tathaṃ avitathaṃ aviparītaṃ saccaṃ , dukkhasamudayanirodhamaggavasena cattāri saccāni samāhaṭānīti catusaccaṃ , taṃ catusaccaṃ pakāsento loke pākaṭaṃ karontoti attho .
Varadhammappavattakoti uttamadhammappavattako pakāsakoti attho .
Amataṃ vuṭṭhin ti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho .
68. Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho .
Aḍḍhakose ṭhito ahan ti ubho ukkhipitvā ṭhito ahanti attho .
Sesaṃ sabbattha uttānatthamevāti .
Padumattheraapadānavaṇṇanā samattā .