3. Uppalahatthiyattheraapadānavaṇṇanā
Tivarāyaṃ nivāsīhan tiādikaṃ āyasmato uppalahatthakattherassa apadānaṃ .
Ayampi purimajinavaresu katakusalo tattha tattha bhave vivaṭṭūpanissayāni puññāni upacinanto siddhatthassa bhagavato kāle mālākārakule nibbatto vuddhimanvāya mālākārakammena anekāni pupphāni vikkiṇanto jīvati .
Athekadivasaṃ pupphāni gahetvā caranto bhagavantaṃ ratanagghikamiva caramānaṃ disvā rattuppalakalāpena pūjesi .
So tato cuto teneva puññena sugatīsu puññamanubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi .
13. So
V2.115 aparabhāge attano pubbakammaṃ saritvā somanassajāto pubbacaritāpadānaṃ pakāsento tivarāyaṃ nivāsīhan tiādimāha .Tattha tivarāti tīhi vārehi kāritaṃ sañcaritaṃ paṭicchannaṃ nagaraṃ , tassaṃ tivarāyaṃ nivāsī , vasanasīlo nivāsanaṭṭhānagehe vā vasanto ahanti attho .
Ahosiṃ māliko tadāti tadā nibbānatthāya puññasambhārakaraṇasamaye māliko mālākārova pupphāni kayavikkayaṃ katvā jīvanto ahosinti attho .
14. Pupphahatthamadāsahan ti
M2.123 siddhatthaṃ bhagavantaṃ disvā uppalakalāpaṃ adāsiṃ pūjesinti attho .Sesaṃ sabbattha uttānatthamevāti .
Uppalahatthakattheraapadānavaṇṇanā samattā .