6. Karotosuttavaṇṇanā
211. Karototi
M2.312 sahatthā karontassa .Kārayatoti āṇattiyā kārentassa .
Chindatoti paresaṃ hatthādīni chindantassa .
Chedāpayatoti parehi chedāpentassa .
Pacatoti daṇḍena pīḷentassa .
Pacāpayatoti parehi daṇḍādinā pīḷāpentassa .
Socato socāpayatoti parassa bhaṇḍaharaṇādīhi sokaṃ sayaṃ karontassāpi parehi kārentassāpi .
Kilamato kilamāpayatoti āhārupacchedabandhanāgārapavesanādīhi sayaṃ kilamentassapi parehi kilamāpentassapi .
Phandato phandāpayatoti paraṃ phandantaṃ phandanakāle sayampi phandato parempi phandāpayato .
Pāṇamatipātayatoti
P2.340 pāṇaṃ hanantassapi hanāpentassapi .Evaṃ sabbattha karaṇakārāpanavaseneva attho veditabbo .
Sandhin ti gharasandhiṃ .
Nillopan ti mahāvilopaṃ .
Ekāgārikan ti ekameva gharaṃ parivāretvā vilumpanaṃ .
Paripanthe tiṭṭhatoti āgatāgatānaṃ acchindanatthaṃ magge tiṭṭhato .
Karoto na karīyati pāpan ti yaṃkiñci pāpaṃ karomīti saññāya karotopi pāpaṃ na karīyati , natthi pāpaṃ .
Sattā pana karomāti evaṃsaññino hontīti dīpenti .
Khurapariyantenāti khuraneminā , khuradhārasadisapariyantena vā .
Ekamaṃsakhalan ti ekamaṃsarāsiṃ .
Puñjan ti tasseva vevacanaṃ .
Tatonidānan ti ekamaṃsakhalakaraṇanidānaṃ .
Dakkhiṇan ti dakkhiṇatīre manussā kakkhaḷā dāruṇā , te sandhāya hanantotiādi vuttaṃ .
Uttaran ti uttaratīre saddhā honti pasannā buddhamāmakā dhammamāmakā saṅghamāmakā , te sandhāya dadantotiādi vuttaṃ .
Tattha yajantoti mahāyāgaṃ karonto .
Damenāti indriyadamena uposathakammena .
Saṃyamenāti sīlasaṃyamena .
Saccavajjenāti saccavacanena .
Āgamoti āgamanaṃ , pavattīti attho .
Sabbathāpi pāpapuññānaṃ kiriyameva paṭikkhipanti .