8. Macchabandhasuttaṃ
18. Ekaṃ samayaṃ bhagavā kosalesu cārikaṃ carati mahatā bhikkhusaṅghena saddhiṃ .
Addasā kho bhagavā addhānamaggappaṭipanno aññatarasmiṃ padese macchikaṃ macchabandhaṃ macche vadhitvā vadhitvā vikkiṇamānaṃ .
Disvā maggā okkamma aññatarasmiṃ rukkhamūle paññatte āsane nisīdi .
Nisajja kho bhagavā bhikkhū āmantesi –
‘‘ passatha no tumhe , bhikkhave , amuṃ macchikaṃ macchabandhaṃ macche vadhitvā vadhitvā vikkiṇamānan ’’ ti ?
‘‘ Evaṃ , bhante ’’.
‘‘ Taṃ kiṃ maññatha , bhikkhave , api nu tumhehi diṭṭhaṃ vā sutaṃ vā –
‘ macchiko macchabandho macche vadhitvā vadhitvā
P3.302 vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṃ vā bhogakkhandhaṃ ajjhāvasanto ’’’ ti ?‘‘ No hetaṃ , bhante ’’
M2.267 .‘‘ Sādhu , bhikkhave !
Mayāpi kho etaṃ , bhikkhave , neva diṭṭhaṃ na sutaṃ –
‘ macchiko macchabandho macche vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī
T3.337 vā mahantaṃ vā bhogakkhandhaṃ ajjhāvasanto ’ ti .Taṃ kissa hetu ?
Te hi so , bhikkhave , macche vajjhe vadhāyupanīte [ vadhāyānīte ( syā . kaṃ .), vadhāya nīte ( ka .)] pāpakena manasānupekkhati , tasmā so neva hatthiyāyī hoti na assayāyī na rathayāyī na yānayāyī na bhogabhogī , na mahantaṃ bhogakkhandhaṃ ajjhāvasati .
‘‘ Taṃ kiṃ maññatha , bhikkhave , api nu tumhehi diṭṭhaṃ vā sutaṃ vā –
‘ goghātako gāvo vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṃ vā bhogakkhandhaṃ ajjhāvasanto ’’’ ti ?
‘‘ No hetaṃ , bhante ’’.
‘‘ Sādhu , bhikkhave !
Mayāpi kho etaṃ , bhikkhave , neva diṭṭhaṃ na sutaṃ –
‘ goghātako gāvo vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṃ vā bhogakkhandhaṃ ajjhāvasanto ’ ti .
Taṃ kissa hetu ?
Te hi so , bhikkhave , gāvo vajjhe vadhāyupanīte pāpakena
V2.22 manasānupekkhati , tasmā so neva hatthiyāyī hoti na assayāyī na rathayāyī na yānayāyī na bhogabhogī , na mahantaṃ bhogakkhandhaṃ ajjhāvasati ’’.‘‘ Taṃ kiṃ maññatha , bhikkhave , api nu tumhehi diṭṭhaṃ vā
P3.303 sutaṃ vā –‘ orabbhiko … pe … sūkariko [ sokariko ( syā .)]… pe … sākuṇiko … pe … māgaviko mage [ mige ( syā . kaṃ .)] vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī
T3.338 vā bhogabhogī vā mahantaṃ vā bhogakkhandhaṃ ajjhāvasanto ’’’ ti ?‘‘ No hetaṃ , bhante ’’.
‘‘ Sādhu , bhikkhave !
Mayāpi kho etaṃ , bhikkhave , neva diṭṭhaṃ na sutaṃ –
‘ māgaviko mage vadhitvā vadhitvā vikkiṇamāno tena kammena tena ājīvena hatthiyāyī vā assayāyī vā rathayāyī vā yānayāyī vā bhogabhogī vā mahantaṃ vā bhogakkhandhaṃ ajjhāvasanto ’ ti .
Taṃ kissa hetu ?
Te hi so , bhikkhave , mage vajjhe vadhāyupanīte pāpakena manasānupekkhati , tasmā so neva hatthiyāyī hoti na assayāyī na rathayāyī na yānayāyī
M2.268 na bhogabhogī , na mahantaṃ bhogakkhandhaṃ ajjhāvasati .Te hi ( nāma )[() bahūsu natthi ] so , bhikkhave , tiracchānagate pāṇe vajjhe vadhāyupanīte pāpakena manasānupekkhamāno [ manasānupekkhati , tasmā so ( syā . ka .)] neva hatthiyāyī bhavissati [ hoti ( syā . ka .)] na assayāyī na rathayāyī na yānayāyī na bhogabhogī , na mahantaṃ bhogakkhandhaṃ ajjhāvasissati [ ajjhāvasati ( syā . ka .)].
Ko pana vādo yaṃ manussabhūtaṃ vajjhaṃ vadhāyupanītaṃ pāpakena manasānupekkhati !
Tañhi tassa [ taṃ hissa ( pī . ka .)], bhikkhave , hoti dīgharattaṃ ahitāya dukkhāya .
Kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjatī ’’ ti .
Aṭṭhamaṃ .