3. Iṇasuttaṃ
45.‘‘ Dāliddiyaṃ [ dāḷiddiyaṃ ( sī .)], bhikkhave , dukkhaṃ lokasmiṃ kāmabhogino ’’ ti ?
‘‘ Evaṃ , bhante ’’.
‘‘ Yampi , bhikkhave , daliddo [ daḷiddo ( sī .)] assako
P3.352 anāḷhiko [ anaddhiko ( syā . kaṃ .)] iṇaṃ ādiyati , iṇādānampi , bhikkhave , dukkhaṃ lokasmiṃ kāmabhogino ’’ ti ?‘‘ Evaṃ , bhante ’’.
‘‘ Yampi , bhikkhave , daliddo assako anāḷhiko iṇaṃ ādiyitvā vaḍḍhiṃ paṭissuṇāti , vaḍḍhipi , bhikkhave , dukkhā lokasmiṃ kāmabhogino ’’ ti ?
‘‘ Evaṃ , bhante ’’.
‘‘ Yampi , bhikkhave , daliddo assako anāḷhiko vaḍḍhiṃ paṭissuṇitvā
V2.66 kālābhataṃ [ kālagataṃ ( ka .)] vaḍḍhiṃ na deti , codentipi naṃ ;codanāpi , bhikkhave , dukkhā lokasmiṃ kāmabhogino ’’ ti ?
‘‘ Evaṃ , bhante ’’.
‘‘ Yampi , bhikkhave , daliddo assako anāḷhiko codiyamāno na deti , anucarantipi naṃ ;
anucariyāpi , bhikkhave , dukkhā lokasmiṃ kāmabhogino ’’ ti ?
‘‘ Evaṃ , bhante ’’.
‘‘ Yampi , bhikkhave , daliddo assako anāḷhiko anucariyamāno na deti , bandhantipi naṃ ;
bandhanampi , bhikkhave , dukkhaṃ lokasmiṃ kāmabhogino ’’ ti ?
‘‘ Evaṃ , bhante ’’.
‘‘ Iti kho , bhikkhave , dāliddiyampi dukkhaṃ lokasmiṃ kāmabhogino , iṇādānampi dukkhaṃ lokasmiṃ kāmabhogino , vaḍḍhipi dukkhā lokasmiṃ kāmabhogino , codanāpi dukkhā lokasmiṃ kāmabhogino , anucariyāpi dukkhā lokasmiṃ kāmabhogino , bandhanampi dukkhaṃ lokasmiṃ kāmabhogino ;
evamevaṃ kho , bhikkhave
T3.394 , yassa kassaci saddhā natthi kusalesu dhammesu , hirī natthi kusalesu dhammesu , ottappaṃ natthi kusalesu dhammesu , vīriyaṃ natthi kusalesu dhammesu , paññā natthi kusalesu dhammesu – ayaṃ vuccati , bhikkhave , ariyassa vinaye daliddo assako anāḷhiko .‘‘ Sa kho so , bhikkhave , daliddo assako anāḷhiko saddhāya asati kusalesu dhammesu , hiriyā asati kusalesu dhammesu , ottappe asati kusalesu dhammesu , vīriye asati kusalesu dhammesu , paññāya asati
M2.310 kusalesu dhammesu , kāyena duccaritaṃ carati , vācāya duccaritaṃ carati , manasā duccaritaṃ carati .Idamassa iṇādānasmiṃ vadāmi .
‘‘ So tassa kāyaduccaritassa paṭicchādanahetu pāpikaṃ icchaṃ paṇidahati [ padahati ( ka .)].
‘ Mā maṃ jaññū ’ ti icchati ,‘ mā maṃ jaññū ’ ti saṅkappati
P3.353 ,‘ mā maṃ jaññū ’ ti vācaṃ bhāsati ,‘ mā maṃ jaññū ’ ti kāyena parakkamati .So tassa vacīduccaritassa paṭicchādanahetu … pe … so tassa manoduccaritassa paṭicchādanahetu … pe …‘ mā maṃ jaññū ’ ti kāyena parakkamati .
Idamassa vaḍḍhiyā vadāmi .
‘‘ Tamenaṃ pesalā sabrahmacārī evamāhaṃsu –
‘ ayañca so āyasmā evaṃkārī evaṃsamācāro ’ ti .
Idamassa codanāya vadāmi .
‘‘ Tamenaṃ
V2.67 araññagataṃ vā rukkhamūlagataṃ vā suññāgāragataṃ vā vippaṭisārasahagatā pāpakā akusalavitakkā samudācaranti .Idamassa anucariyāya
T3.395 vadāmi .‘‘ Sa kho so , bhikkhave , daliddo assako anāḷhiko kāyena duccaritaṃ caritvā vācāya duccaritaṃ caritvā manasā duccaritaṃ caritvā kāyassa bhedā paraṃ maraṇā nirayabandhane vā bajjhati tiracchānayonibandhane vā .
Nāhaṃ , bhikkhave , aññaṃ ekabandhanampi samanupassāmi evaṃdāruṇaṃ evaṃkaṭukaṃ [ evaṃdukkhaṃ ( syā . kaṃ . ka .)] evaṃantarāyakaraṃ anuttarassa yogakkhemassa adhigamāya , yathayidaṃ , bhikkhave , nirayabandhanaṃ vā tiracchānayonibandhanaṃ vā ’’ ti .
‘‘ Dāliddiyaṃ dukkhaṃ loke , iṇādānañca vuccati ;
Daliddo iṇamādāya , bhuñjamāno vihaññati .
‘‘ Tato anucaranti naṃ , bandhanampi nigacchati ;
Etañhi bandhanaṃ dukkhaṃ , kāmalābhābhijappinaṃ .
‘‘ Tatheva ariyavinaye , saddhā yassa na vijjati ;
Ahirīko
P3.354 anottappī , pāpakammavinibbayo .‘‘ Kāyaduccaritaṃ katvā , vacīduccaritāni ca ;
Manoduccaritaṃ katvā ,‘ mā maṃ jaññū ’ ti icchati .
‘‘ So
M2.311 saṃsappati [ saṅkappati ( ka .)] kāyena , vācāya uda cetasā ;Pāpakammaṃ pavaḍḍhento , tattha tattha punappunaṃ .
‘‘ So pāpakammo dummedho , jānaṃ dukkaṭamattano ;
Daliddo iṇamādāya , bhuñjamāno vihaññati .
‘‘ Tato
V2.68 anucaranti naṃ , saṅkappā mānasā dukhā ;Gāme
T3.396 vā yadi vāraññe , yassa vippaṭisārajā .‘‘ So pāpakammo dummedho , jānaṃ dukkaṭamattano ;
Yonimaññataraṃ gantvā , niraye vāpi bajjhati .
‘‘ Etañhi bandhanaṃ dukkhaṃ , yamhā dhīro pamuccati ;
Dhammaladdhehi bhogehi , dadaṃ cittaṃ pasādayaṃ .
‘‘ Ubhayattha kaṭaggāho , saddhassa gharamesino ;
Diṭṭhadhammahitatthāya , samparāyasukhāya ca ;
Evametaṃ gahaṭṭhānaṃ , cāgo puññaṃ pavaḍḍhati .
‘‘ Tatheva ariyavinaye , saddhā yassa patiṭṭhitā ;
Hirīmano ca ottappī , paññavā sīlasaṃvuto .
‘‘ Eso kho ariyavinaye ,‘ sukhajīvī ’ ti vuccati ;
Nirāmisaṃ sukhaṃ laddhā , upekkhaṃ adhitiṭṭhati .
‘‘ Pañca nīvaraṇe hitvā , niccaṃ āraddhavīriyo ;
Jhānāni upasampajja , ekodi nipako sato .
‘‘ Evaṃ ñatvā yathābhūtaṃ , sabbasaṃyojanakkhaye ;
Sabbaso anupādāya , sammā cittaṃ vimuccati .
‘‘ Tassa sammā vimuttassa , ñāṇaṃ ce hoti tādino ;
‘ Akuppā me vimuttī ’ ti , bhavasaṃyojanakkhaye .
‘‘ Etaṃ kho paramaṃ ñāṇaṃ , etaṃ sukhamanuttaraṃ ;
Asokaṃ virajaṃ khemaṃ , etaṃ ānaṇyamuttaman ’’ ti .
tatiyaṃ ;