2. Anupubbavihārasamāpattisuttaṃ

sāsanāre-သာသနာရေး

မြန်မာဘာသာ

2. Anupubbavihārasamāpattisuttaṃ

Author： _System_Pali_VRI_ @ Administrator

2. Anupubbavihārasamāpattisuttaṃ

33.‘‘ Navayimā , bhikkhave [ nava bhikkhave (?)], anupubbavihārasamāpattiyo desessāmi , taṃ suṇātha … pe … katamā ca , bhikkhave , nava anupubbavihārasamāpattiyo ?

Yattha kāmā nirujjhanti , ye ca kāme nirodhetvā nirodhetvā viharanti ,‘ addhā te āyasmanto nicchātā nibbutā tiṇṇāP4.411 pāraṅgatā tadaṅgenā ’ ti vadāmi .

‘ Kattha kāmā nirujjhanti , ke ca kāme nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvusoT4.425 , bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajjaM3.210 viharati .

Ettha kāmā nirujjhanti , te ca kāme nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha vitakkavicārā nirujjhanti , ye ca vitakkavicāre nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha vitakkavicārā nirujjhanti , ke ca vitakkavicāre nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyoV3.220 –

‘ idhāvuso , bhikkhu vitakkavicārānaṃ vūpasamā … pe … dutiyaṃ jhānaṃ upasampajja viharati ;

ettha vitakkavicārā nirujjhanti , te ca vitakkavicāre nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha pīti nirujjhati , ye ca pītiṃ nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha pīti nirujjhati , ke ca pītiṃ nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu pītiyā ca virāgā … pe …T4.426 tatiyaṃ jhānaṃ upasampajja viharati ;

ettha pīti nirujjhati , te ca pītiṃ nirodhetvā nirodhetvāP4.412 viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha upekkhāsukhaṃ nirujjhati , ye ca upekkhāsukhaṃ nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha upekkhāsukhaṃ nirujjhati , ke ca upekkhāsukhaṃ nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sukhassa ca pahānā … pe … catutthaṃ jhānaṃ upasampajja viharati ;

ettha upekkhāsukhaṃ nirujjhati , te ca upekkhāsukhaṃ nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyyaM3.211 anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha rūpasaññā nirujjhati , ye ca rūpasaññaṃ [ yattha rūpasaññā nirujjhanti , ye ca rūpasaññā ( sī . syā . pī .)] nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha rūpasaññā nirujjhatiV3.221 , ke ca rūpasaññaṃ nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃT4.427 upasampajja viharati .

Ettha rūpasaññā nirujjhati , te ca rūpasaññaṃ nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ YatthaP4.413 ākāsānañcāyatanasaññā nirujjhati , ye ca ākāsānañcāyatanasaññaṃ nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha ākāsānañcāyatanasaññā nirujjhati , ke ca ākāsānañcāyatanasaññaṃ nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharati .

Ettha ākāsānañcāyatanasaññā nirujjhati , te ca ākāsānañcāyatanasaññaṃ nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha viññāṇañcāyatanasaññā nirujjhati , ye ca viññāṇañcāyatanasaññaṃ nirodhetvā nirodhetvā viharanti ,‘ addhā te āyasmanto nicchātā nibbutāM3.212 tiṇṇā pāraṅgatā tadaṅgenā ’ ti vadāmi .

‘ Kattha viññāṇañcāyatanasaññā nirujjhati , ke ca viññāṇañcāyatanasaññaṃ nirodhetvā nirodhetvā viharanti – ahametaṃT4.428 na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharati .

Ettha viññāṇañcāyatanasaññā nirujjhati , te ca viññāṇañcāyatanasaññaṃ nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyyaV3.222 ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha ākiñcaññāyatanasaññā nirujjhati , ye ca ākiñcaññāyatanasaññaṃ nirodhetvā nirodhetvā viharanti ,‘ addhā te āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha ākiñcaññāyatanasaññā nirujjhati , ke ca ākiñcaññāyatanasaññaṃ nirodhetvā nirodhetvā viharanti – ahametaṃP4.414 na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati .

Ettha ākiñcaññāyatanasaññā nirujjhati , te ca ākiñcaññāyatanasaññaṃ nirodhetvā nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

‘‘ Yattha nevasaññānāsaññāyatanasaññā nirujjhati , ye ca nevasaññānāsaññāyatanasaññaṃ nirodhetvā nirodhetvā viharanti ,‘ addhā teT4.429 āyasmanto nicchātā nibbutā tiṇṇā pāraṅgatā tadaṅgenā ’ ti vadāmi .

‘ Kattha nevasaññānāsaññāyatanasaññā nirujjhati , ke ca nevasaññānāsaññāyatanasaññaṃ nirodhetvā nirodhetvā viharanti – ahametaṃ na jānāmi ahametaṃ na passāmī ’ ti , iti yo evaṃ vadeyya , so evamassa vacanīyo –

‘ idhāvuso , bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati .

Ettha nevasaññānāsaññāyatanasaññā nirujjhati , te ca nevasaññānāsaññāyatanasaññaṃ nirodhetvāM3.213 nirodhetvā viharantī ’ ti .

Addhā , bhikkhave , asaṭho amāyāvī ‘ sādhū ’ ti bhāsitaṃ abhinandeyya anumodeyya ;

‘ sādhū ’ ti bhāsitaṃ abhinanditvā anumoditvā namassamāno pañjaliko payirupāseyya .

Imā kho , bhikkhave , nava anupubbavihārasamāpattiyo ’’ ti .

Dutiyaṃ .