7. Lokāyatikasuttaṃ

38. Atha kho dve lokāyatikā brāhmaṇā yena bhagavā tenupasaṅkamiṃsu ;

upasaṅkamitvā bhagavatā saddhiṃ sammodiṃsu .

Sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu .

Ekamantaṃ nisinnā kho te brāhmaṇā bhagavantaṃ etadavocuṃ –

‘‘ Pūraṇo , bho gotama , kassapo sabbaññū sabbadassāvī aparisesaṃ ñāṇadassanaṃ paṭijānāti –

‘ carato ca me tiṭṭhato ca suttassa ca jāgarassaM3.226 ca satataṃ samitaṃ ñāṇadassanaṃT4.447 paccupaṭṭhitan ’ ti .

So evamāha –

‘ ahaṃ anantena ñāṇena anantaṃ lokaṃ jānaṃ passaṃV3.236 viharāmī ’ ti .

AyampiP4.429 [ ayampi hi ( syā . ka .)], bho gotama , nigaṇṭho nāṭaputto sabbaññū sabbadassāvī aparisesaṃ ñāṇadassanaṃ paṭijānāti –

‘ carato ca me tiṭṭhato ca suttassa ca jāgarassa ca satataṃ samitaṃ ñāṇadassanaṃ paccupaṭṭhitan ’ ti .

So [ sopi (?)] evamāha –

‘ ahaṃ anantena ñāṇena anantaṃ lokaṃ jānaṃ passaṃ viharāmī ’ ti .

Imesaṃ , bho gotama , ubhinnaṃ ñāṇavādānaṃ ubhinnaṃ aññamaññaṃ vipaccanīkavādānaṃ ko saccaṃ āha ko musā ’’ ti ?

‘‘ Alaṃ , brāhmaṇā !

Tiṭṭhatetaṃ –

‘ imesaṃ ubhinnaṃ ñāṇavādānaṃ ubhinnaṃ aññamaññaṃ vipaccanīkavādānaṃ ko saccaṃ āha ko musā ’ ti .

Dhammaṃ vo , brāhmaṇā , desessāmi , taṃ suṇātha , sādhukaṃ manasi karotha ;

bhāsissāmī ’’ ti .

‘‘ Evaṃ , bho ’’ ti kho te brāhmaṇā bhagavato paccassosuṃ .

Bhagavā etadavoca –

‘‘ Seyyathāpi , brāhmaṇā , cattāro purisā catuddisā ṭhitā paramena javena ca samannāgatā paramena ca padavītihārena .

Te evarūpena javena samannāgatā assu , seyyathāpi nāma daḷhadhammā [ daḷhadhammo ( sabbattha ) a . ni .4.45; ma . ni .1.116 ca , taṃsaṃvaṇṇanāṭīkāyo ca moggallānabyākaraṇañca oloketabbā ] dhanuggaho sikkhito katahattho katūpāsano lahukena asanena appakasirena tiriyaṃ tālacchāyaṃ [ tālacchātiṃ ( sī . syā . pī .), tālacchādiṃ ( ka .) a . ni .4.45; ma . ni .1.161 passitabbaṃ ] atipāteyya ;

evarūpena ca padavītihārena , seyyathāpi nāma puratthimā samuddā pacchimo samuddo atha puratthimāya disāya ṭhito puriso evaṃ vadeyya –

‘ ahaṃ gamanena lokassa antaṃ pāpuṇissāmī ’ ti .

So aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanāT4.448 vassasatāyuko vassasatajīvī vassasataṃ gantvā appatvāva lokassa antaṃ antarā kālaṃP4.430 kareyya .

Atha pacchimāya disāya … pe … atha uttarāya disāya … atha dakkhiṇāya disāya ṭhito puriso evaṃ vadeyya –

‘ ahaṃ gamanena lokassa antaṃ pāpuṇissāmī ’ ti .

So aññatreva asitapītakhāyitasāyitā aññatra uccārapassāvakammā aññatraM3.227 niddākilamathapaṭivinodanā vassasatāyuko vassasatajīvī vassasataṃ gantvā appatvāva lokassa antaṃ antarā kālaṃ kareyya .

Taṃ kissa hetu ?

Nāhaṃ , brāhmaṇā , evarūpāya sandhāvanikāya lokassa antaṃ ñāteyyaṃ daṭṭheyyaṃ patteyyanti vadāmi .

Na cāhaṃ , brāhmaṇā , appatvāva lokassa antaṃ dukkhassa antakiriyaṃ vadāmi .

‘‘ Pañcime , brāhmaṇā , kāmaguṇā ariyassa vinaye lokoti vuccati .

Katame pañca ?

CakkhuviññeyyāV3.237 rūpā iṭṭhā kantā manāpā piyarūpā kāmūpasaṃhitā rajanīyā ;

sotaviññeyyā saddā … pe … ghānaviññeyyā gandhā … jivhāviññeyyā rasā … kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā ;

ime kho , brāhmaṇā , pañca kāmaguṇā ariyassa vinaye lokoti vuccati .

‘‘ Idha , brāhmaṇā , bhikkhu vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharati .

Ayaṃ vuccati , brāhmaṇā ,‘ bhikkhu lokassa antamāgamma , lokassa ante viharati ’.

Tamaññe evamāhaṃsu –

‘ ayampiT4.449 lokapariyāpanno , ayampi anissaṭo lokamhā ’ ti .

Ahampi hi [ ahampi ( sī . pī .)], brāhmaṇā , evaṃ vadāmi –

‘ ayampi lokapariyāpanno , ayampi anissaṭo lokamhā ’’’ ti .

‘‘ PunaP4.431 caparaṃ , brāhmaṇā , bhikkhu vitakkavicārānaṃ vūpasamā … pe … dutiyaṃ jhānaṃ … tatiyaṃ jhānaṃ … catutthaṃ jhānaṃ upasampajja viharati .

Ayaṃ vuccati , brāhmaṇā ,‘ bhikkhu lokassa antamāgamma lokassa ante viharati ’.

Tamaññe evamāhaṃsu –

‘ ayampi lokapariyāpanno , ayampi anissaṭo lokamhā ’ ti .

Ahampi hi , brāhmaṇā , evaṃ vadāmi –

‘ ayampi lokapariyāpanno , ayampi anissaṭo lokamhā ’’’ ti .

‘‘ Puna caparaṃ , brāhmaṇā , bhikkhu sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘ ananto ākāso ’ ti ākāsānañcāyatanaṃ upasampajja viharati .

Ayaṃ vuccati , brāhmaṇā ,‘ bhikkhu lokassa antamāgamma lokassa ante viharati ’.

Tamaññe evamāhaṃsu –

‘ ayampi lokapariyāpanno , ayampi anissaṭo lokamhā ’ tiM3.228 .

Ahampi hi , brāhmaṇā , evaṃ vadāmi –

‘ ayampi lokapariyāpanno , ayampi anissaṭo lokamhā ’’’ ti .

‘‘ Puna caparaṃ , brāhmaṇā , bhikkhu sabbaso ākāsānañcāyatanaṃ samatikkamma ‘ anantaṃ viññāṇan ’ tiV3.238 viññāṇañcāyatanaṃ upasampajja viharati … pe … sabbaso viññāṇañcāyatanaṃ samatikkamma ‘ natthi kiñcī ’ ti ākiñcaññāyatanaṃ upasampajja viharati … pe … sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharati .

Ayaṃ vuccati , brāhmaṇāT4.450 ,‘ bhikkhu lokassa antamāgamma lokassa ante viharati ’.

Tamaññe evamāhaṃsu –

‘ ayampi lokapariyāpanno , ayampi anissaṭo lokamhā ’ ti .

Ahampi hi , brāhmaṇā , evaṃ vadāmi –

‘ ayampi lokapariyāpanno , ayampi anissaṭo lokamhā ’’’ ti .

‘‘ Puna caparaṃ , brāhmaṇā , bhikkhu sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati , paññāya cassa disvā āsavā parikkhīṇā honti .

Ayaṃ vuccati , brāhmaṇā ,‘ bhikkhu lokassaP4.432 antamāgamma lokassa ante viharati tiṇṇo loke visattikan ’’’ ti .

Sattamaṃ .

Issues

Select Version

Navakanipātapāḷi

Navakanipātapāḷi