10. Tapussasuttaṃ

41. EkaṃV3.243 samayaṃ bhagavā mallesu viharati uruvelakappaṃ nāma mallānaṃ nigamo .

Atha kho bhagavā pubbaṇhasamayaṃ nivāsetvā pattacīvaramādāya uruvelakappaṃ piṇḍāya pāvisi .

Uruvelakappe piṇḍāya caritvā pacchābhattaṃ piṇḍapātapaṭikkanto āyasmantaṃ ānandaṃ āmantesi –

‘‘ idheva tāva tvaṃ , ānanda , hohi , yāvāhaṃ mahāvanaṃ ajjhogāhāmi divāvihārāyā ’’ ti .

‘‘ Evaṃ , bhante ’’ ti kho āyasmā ānando bhagavato paccassosi .

Atha kho bhagavā mahāvanaṃ ajjhogāhetvā aññatarasmiṃ rukkhamūle divāvihāraṃ nisīdi .

Atha kho tapusso gahapati yenāyasmā ānando tenupasaṅkami ;

upasaṅkamitvā āyasmantaṃ ānandaṃ abhivādetvā ekamantaṃ nisīdi .

Ekamantaṃ nisinno kho tapusso gahapati āyasmantaṃ ānandaṃ etadavoca –

‘‘ Mayaṃ , bhante ānanda , gihī kāmabhogino kāmārāmā kāmaratā kāmasammuditā .

Tesaṃ no , bhante , amhākaṃ gihīnaṃ kāmabhogīnaṃ kāmārāmānaṃ kāmaratānaṃ kāmasammuditānaṃT4.457 papāto viya khāyati , yadidaṃ nekkhammaṃ .

Sutaṃ metaṃ , bhante ,‘ imasmiṃ dhammavinaye daharānaṃ daharānaṃ bhikkhūnaṃ nekkhamme cittaṃ pakkhandati pasīdati santiṭṭhati vimuccati etaṃ santanti passato ’[ passataṃ (?)].

Tayidaṃ , bhante , imasmiṃ dhammavinaye bhikkhūnaṃ bahunā janena visabhāgo , yadidaṃ nekkhamman ’’ ti .

‘‘ AtthiP4.439 kho etaṃ , gahapati , kathāpābhataṃ bhagavantaṃ dassanāya .

Āyāma , gahapati , yena bhagavā tenupasaṅkamissāma ;

upasaṅkamitvā bhagavato etamatthaṃ ārocessāma .

Yathā no bhagavā byākarissati tathā naṃ dhāressāmā ’’ ti .

‘‘ Evaṃ , bhante ’’ ti kho tapusso gahapati āyasmato ānandassa paccassosi .

Atha kho āyasmā ānando tapussena gahapatinā saddhiṃM3.234 yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinno kho āyasmā ānando bhagavantaṃ etadavoca –

‘‘ AyaṃV3.244 , bhante , tapusso gahapati evamāha –

‘ mayaṃ , bhante ānanda , gihī kāmabhogino kāmārāmā kāmaratā kāmasammuditā , tesaṃ no bhante , amhākaṃ gihīnaṃ kāmabhogīnaṃ kāmārāmānaṃ kāmaratānaṃ kāmasammuditānaṃ papāto viya khāyati , yadidaṃ nekkhammaṃ ’.

Sutaṃ metaṃ , bhante ,‘ imasmiṃ dhammavinaye daharānaṃ daharānaṃ bhikkhūnaṃ nekkhamme cittaṃ pakkhandati pasīdati santiṭṭhati vimuccati etaṃ santanti passato .

Tayidaṃ , bhante , imasmiṃ dhammavinaye bhikkhūnaṃ bahunā janena visabhāgo yadidaṃ nekkhamman ’’’ ti .

‘‘ Evametaṃ , ānanda , evametaṃ , ānanda !

Mayhampi kho , ānanda , pubbeva sambodhā anabhisambuddhassa bodhisattasseva sato etadahosi –

‘ sādhu nekkhammaṃT4.458 , sādhu paviveko ’ ti .

Tassa mayhaṃ , ānanda , nekkhamme cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yena me nekkhamme cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ kāmesu kho me ādīnavo adiṭṭho , so ca me abahulīkato , nekkhamme ca ānisaṃso anadhigato , so ca me anāsevitoP4.440 .

Tasmā me nekkhamme cittaṃ na pakkhandati nappasīdati na santiṭṭhati na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ kāmesu ādīnavaṃ disvā taṃ bahulaṃ kareyyaṃ [ bahulīkareyyaṃ ( sī . syā . pī .)], nekkhamme ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me nekkhamme cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena kāmesu ādīnavaṃ disvā taṃ bahulamakāsiṃ , nekkhamme ānisaṃsaṃ adhigamma tamāseviṃ .

Tassa mayhaṃ , ānanda , nekkhamme cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi .

Tassa mayhaṃ , ānanda , iminā vihārena viharato kāmasahagatā saññāmanasikārā samudācaranti .

Svassa me hoti ābādhoM3.235 .

Seyyathāpi , ānanda , sukhino dukkhaṃ uppajjeyyaT4.459 yāvadeva ābādhāya ;

evamevassa me kāmasahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ vitakkavicārānaṃ vūpasamā … pe … dutiyaṃV3.245 jhānaṃ upasampajja vihareyyan ’ ti .

Tassa mayhaṃ , ānanda , avitakke cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yena me avitakke cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ vitakkesu kho me ādīnavo adiṭṭho , so ca me abahulīkato , avitakke ca ānisaṃso anadhigato , so caP4.441 me anāsevito .

Tasmā me avitakke cittaṃ na pakkhandati nappasīdati na santiṭṭhati na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ vitakkesu ādīnavaṃ disvā taṃ bahulaṃ kareyyaṃ , avitakke ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me avitakke cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena vitakkesu ādīnavaṃ disvā taṃ bahulamakāsiṃ , avitakke ānisaṃsaṃ adhigamma tamāseviṃ .

Tassa mayhaṃ , ānanda , avitakke cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , vitakkavicārānaṃ vūpasamā … pe … dutiyaṃ jhānaṃ upasampajjaT4.460 viharāmi .

Tassa mayhaṃ , ānanda , iminā vihārena viharato vitakkasahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me vitakkasahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ pītiyā ca virāgā upekkhako ca vihareyyaṃ sato ca sampajāno sukhañca kāyena paṭisaṃvedeyyaṃ yaṃ taṃ ariyā ācikkhanti – upekkhako satimā sukhavihārīti tatiyaṃ jhānaṃ upasampajja vihareyyan ’ ti .

Tassa mayhaṃ , ānanda , nippītike cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayoM3.236 , yena me nippītike cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ pītiyā kho me ādīnavo adiṭṭho , so ca me abahulīkato , nippītike ca ānisaṃso anadhigato , so ca me anāsevito .

Tasmā me nippītike cittaṃ na pakkhandati nappasīdati na santiṭṭhatiP4.442 na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ pītiyā ādīnavaṃ disvā taṃV3.246 bahulaṃ kareyyaṃ , nippītike ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me nippītike cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena pītiyā ādīnavaṃ disvā taṃ bahulamakāsiṃ , nippītike ānisaṃsaṃ adhigamma tamāseviṃ .

Tassa mayhaṃ , ānanda , nippītike cittaṃ pakkhandati pasīdati santiṭṭhati vimuccati etaṃ santanti passato .

SoT4.461 kho ahaṃ , ānanda , pītiyā ca virāgā … pe … tatiyaṃ jhānaṃ upasampajja viharāmi .

Tassa mayhaṃ , ānanda , iminā vihārena viharato pītisahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me pītisahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja vihareyyan ’ ti .

Tassa mayhaṃ , ānanda , adukkhamasukhe cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yena me adukkhamasukhe cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ upekkhāsukhe kho me ādīnavo adiṭṭho , so ca me abahulīkato , adukkhamasukhe ca ānisaṃso anadhigato , so ca me anāsevito .

Tasmā me adukkhamasukhe cittaṃ na pakkhandati nappasīdati na santiṭṭhati na vimuccati etaṃT4.462 santanti passato ’.

Tassa mayhaṃ , ānanda , etadahosi –

‘ sace kho ahaṃ upekkhāsukhe ādīnavaṃ disvā taṃP4.443 bahulaṃ kareyyaṃ , adukkhamasukhe ānisaṃsaṃ adhigamma tamāseveyyaṃ , ṭhānaṃM3.237 kho panetaṃ vijjati yaṃ me adukkhamasukhe cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena upekkhāsukhe ādīnavaṃ disvā taṃ bahulamakāsiṃ adukkhamasukhe ānisaṃsaṃ adhigamma tamāseviṃ .

Tassa mayhaṃ , ānanda , adukkhamasukhe cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , sukhassa ca pahānā … pe …V3.247 catutthaṃ jhānaṃ upasampajja viharāmi .

Tassa mayhaṃ , ānanda , iminā vihārena viharato upekkhāsahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me upekkhāsahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ‘‘ ananto ākāso ’’ ti ākāsānañcāyatanaṃ upasampajja vihareyyan ’ ti .

Tassa mayhaṃ , ānanda , ākāsānañcāyatane cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yenaT4.463 me ākāsānañcāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ rūpesu kho me ādīnavo adiṭṭho , so ca abahulīkato , ākāsānañcāyatane ca ānisaṃso anadhigato , so ca me anāsevito .

Tasmā me ākāsānañcāyatane cittaṃ na pakkhandati nappasīdati na santiṭṭhati na vimuccati etaṃ santantiP4.444 passato ’.

Tassa mayhaṃ , ānanda , etadahosi –

‘ sace kho ahaṃ rūpesu ādīnavaṃ disvā taṃ bahulaṃ kareyyaṃ , ākāsānañcāyatane ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me ākāsānañcāyatane cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena rūpesu ādīnavaṃ disvā taṃ bahulamakāsiṃ , ākāsānañcāyatane ānisaṃsaṃ adhigamma tamāseviṃ .

Tassa mayhaṃ , ānanda , ākāsānañcāyatane cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , sabbaso rūpasaññānaṃ samatikkamāM3.238 paṭighasaññānaṃ atthaṅgamā nānattasaññānaṃ amanasikārā ‘ ananto ākāso ’ ti ākāsānañcāyatanaṃ upasampajja viharāmi .

Tassa mayhaṃ , ānanda , iminā vihārena viharato rūpasahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me rūpasahagatā saññāmanasikārā samudācaranti .

Svassa me hoti ābādho .

‘‘ TassaT4.464 mayhaṃ , ānanda , etadahosi –

‘ yaṃnūnāhaṃ sabbaso ākāsānañcāyatanaṃ samatikkammaV3.248 ‘‘ anantaṃ viññāṇan ’’ ti viññāṇañcāyatanaṃ upasampajja vihareyyan ’ ti .

Tassa mayhaṃ , ānanda , viññāṇañcāyatane cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yena me viññāṇañcāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ ākāsānañcāyatane kho me ādīnavo adiṭṭho , so ca abahulīkato , viññāṇañcāyatane ca ānisaṃso anadhigato , so ca me anāsevito .

Tasmā me viññāṇañcāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ ākāsānañcāyatane ādīnavaṃ disvā taṃ bahulaṃP4.445 kareyyaṃ , viññāṇañcāyatane ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me viññāṇañcāyatane cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena ākāsānañcāyatane ādīnavaṃ disvā taṃ bahulamakāsiṃ , viññāṇañcāyatane ānisaṃsaṃ adhigamma tamāseviṃ .

Tassa mayhaṃ , ānanda , viññāṇañcāyatane cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , sabbaso ākāsānañcāyatanaṃ samatikkamma ‘ anantaṃ viññāṇan ’ ti viññāṇañcāyatanaṃT4.465 upasampajja viharāmi .

Tassa mayhaṃ , ānanda , iminā vihārena viharato ākāsānañcāyatanasahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāyaM3.239 ;

evamevassa me ākāsānañcāyatanasahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja vihareyyan ’ ti .

Tassa mayhaṃ , ānanda , ākiñcaññāyatane cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu ko paccayo , yena me ākiñcaññāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ viññāṇañcāyatane kho me ādīnavo adiṭṭho , so ca me abahulīkato , ākiñcaññāyatane ca ānisaṃso anadhigato , so ca me anāsevito .

Tasmā me ākiñcaññāyatane cittaṃ na pakkhandati nappasīdati na santiṭṭhatiV3.249 na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ viññāṇañcāyatane ādīnavaṃ disvā taṃ bahulaṃ kareyyaṃ , ākiñcaññāyatane ānisaṃsaṃ adhigamma tamāseveyyaṃ , ṭhānaṃ khoT4.466 panetaṃ vijjati yaṃ me ākiñcaññāyataneP4.446 cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena viññāṇañcāyatane ādīnavaṃ disvā taṃ bahulamakāsiṃ , ākiñcaññāyatane ānisaṃsaṃ adhigamma tamāseviṃ .

Tassa mayhaṃ , ānanda , ākiñcaññāyatane cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , sabbaso viññāṇañcāyatanaṃ samatikkamma ‘ natthi kiñcī ’ ti ākiñcaññāyatanaṃ upasampajja viharāmi .

Tassa mayhaṃ , ānanda , iminā vihārena viharato viññāṇañcāyatanasahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me viññāṇañcāyatanasahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ sabbaso ākiñcaññāyatanaṃ samatikkamma nevasaññānāsaññāyatanaṃ upasampajja vihareyyan ’ ti .

Tassa mayhaṃ , ānanda , nevasaññānāsaññāyatane cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosiM3.240 –

‘ ko nu kho hetu ko paccayo , yena me nevasaññānāsaññāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ ākiñcaññāyatane kho me ādīnavo adiṭṭho , so ca me abahulīkato , nevasaññānāsaññāyataneT4.467 ca ānisaṃso anadhigato , so ca me anāsevito .

Tasmā me nevasaññānāsaññāyatane cittaṃ na pakkhandati nappasīdati na santiṭṭhati na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ ākiñcaññāyatane ādīnavaṃ disvā taṃ bahulaṃ kareyyaṃ , nevasaññānāsaññāyatane ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me nevasaññānāsaññāyatane cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

SoP4.447 kho ahaṃ , ānanda , aparena samayena ākiñcaññāyatane ādīnavaṃ disvā taṃ bahulamakāsiṃ , nevasaññānāsaññāyatane ānisaṃsaṃ adhigamma tamāseviṃ .

Tassa mayhaṃ , ānanda , nevasaññānāsaññāyatane cittaṃ pakkhandati pasīdati santiṭṭhati vimuccati etaṃ santantiV3.250 passato .

So kho ahaṃ , ānanda , sabbaso ākiñcaññāyatanaṃ samatikkamma nevasaññānāsaññāyatanaṃ upasampajja viharāmi .

Tassa mayhaṃ , ānanda , iminā vihārena viharato ākiñcaññāyatanasahagatā saññāmanasikārā samudācaranti .

Svassa me hoti ābādho .

Seyyathāpi , ānanda , sukhino dukkhaṃ uppajjeyya yāvadeva ābādhāya ;

evamevassa me ākiñcaññāyatanasahagatā saññāmanasikārā samudācaranti .

Svassa me hoti ābādho .

‘‘ Tassa mayhaṃ , ānanda , etadahosi –

‘ yaṃnūnāhaṃ nevasaññānāsaññāyatanaṃ samatikkamma saññāvedayitanirodhaṃ upasampajja vihareyyan ’ ti .

TassaT4.468 mayhaṃ , ānanda , saññāvedayitanirodhe cittaṃ na pakkhandati nappasīdati na santiṭṭhati na vimuccati etaṃ santanti passato .

Tassa mayhaṃ , ānanda , etadahosi –

‘ ko nu kho hetu , ko paccayo , yena me saññāvedayitanirodhe cittaṃ na pakkhandati nappasīdati na santiṭṭhati na vimuccati etaṃ santanti passato ’?

Tassa mayhaṃ , ānanda , etadahosi –

‘ nevasaññānāsaññāyatane kho me ādīnavo adiṭṭho , so ca me abahulīkato , saññāvedayitanirodhe ca ānisaṃso anadhigato , soM3.241 ca me anāsevito .

Tasmā me saññāvedayitanirodhe cittaṃ na pakkhandati nappasīdati na santiṭṭhati na vimuccati etaṃ santanti passato ’.

Tassa mayhaṃ , ānanda , etadahosi –

‘ sace kho ahaṃ nevasaññānāsaññāyatane ādīnavaṃ disvā taṃ bahulaṃ kareyyaṃ , saññāvedayitanirodhe ānisaṃsaṃ adhigamma tamāseveyyaṃ , ṭhānaṃ kho panetaṃ vijjati yaṃ me saññāvedayitanirodhe cittaṃ pakkhandeyya pasīdeyya santiṭṭheyya vimucceyya etaṃ santanti passato ’.

So kho ahaṃ , ānanda , aparena samayena nevasaññānāsaññāyatane ādīnavaṃ disvā taṃ bahulamakāsiṃP4.448 , saññāvedayitanirodhe ānisaṃsaṃ adhigamma tamāseviṃ .

Tassa mayhaṃ , ānanda , saññāvedayitanirodhe cittaṃ pakkhandati pasīdati santiṭṭhati vimuccati etaṃ santanti passato .

So kho ahaṃ , ānanda , sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharāmi , paññāya ca me disvā āsavā parikkhayaṃ agamaṃsu .

‘‘ YāvakīvañcāhaṃT4.469 , ānanda , imā nava anupubbavihārasamāpattiyo na evaṃ anulomapaṭilomaṃ samāpajjimpi vuṭṭhahimpi , neva tāvāhaṃ , ānanda , sadevake loke samārake sabrahmake sassamaṇabrāhmaṇiyā pajāya sadevamanussāya ‘ anuttaraṃ sammāsambodhiṃ abhisambuddho ’ ti paccaññāsiṃ .

Yato ca kho ahaṃ , ānanda , imā nava anupubbavihārasamāpattiyo evaṃ anulomapaṭilomaṃV3.251 samāpajjimpi vuṭṭhahimpi , athāhaṃ , ānanda , sadevake loke samārake sabrahmake sassamaṇabrāhmaṇiyā pajāya sadevamanussāya ‘ anuttaraṃ sammāsambodhiṃ abhisambuddho ’ ti paccaññāsiṃ .

Ñāṇañca pana me dassanaṃ udapādi –

‘ akuppā me cetovimutti [ vimutti ( ka . sī . ka .)], ayamantimā jāti , natthi dāni punabbhavo ’’’ ti .

Dasamaṃ .

Mahāvaggo catuttho .

Tassuddānaṃ –

Dve vihārā ca nibbānaṃ , gāvī jhānena pañcamaṃ ;

Ānando brāhmaṇā devo , nāgena tapussena cāti .

Issues

Select Version

Navakanipātapāḷi

Navakanipātapāḷi