2. Sīhanādavaggo

玛欣德尊者

中文

莊春江讀經站

繁体中文

元亨寺·CBETA

中文

English

sāsanāre-သာသနာရေး

မြန်မာဘာသာ

2. Sīhanādavaggo

作者： _System_Pali_VRI_ @ Administrator

2. Sīhanādavaggo

1. Sīhanādasuttaṃ

11. EkaṃV3.190 samayaṃ bhagavā sāvatthiyaṃ viharati jetavane anāthapiṇḍikassa ārāme .

Atha kho āyasmā sāriputto yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinno kho āyasmā sāriputto bhagavantaṃ etadavoca –

‘‘ vutthoT4.387 me , bhante , sāvatthiyaṃ vassāvāso .

Icchāmahaṃ , bhante , janapadacārikaṃ pakkamitun ’’ ti .

‘‘ Yassadāni tvaṃ , sāriputta , kālaṃ maññasī ’’ ti .

Atha kho āyasmā sāriputto uṭṭhāyāsanā bhagavantaṃ abhivādetvā padakkhiṇaṃ katvā pakkāmi .

AthaP4.374 kho aññataro bhikkhu acirapakkante āyasmante sāriputte bhagavantaṃ etadavoca –

‘‘ āyasmā maṃ , bhante , sāriputto āsajja appaṭinissajja cārikaṃ pakkanto ’’ ti .

Atha kho bhagavā aññataraṃ bhikkhuṃ āmantesi –

‘‘ ehiM3.181 tvaṃ , bhikkhu , mama vacanena sāriputtaṃ āmantehi –

‘ satthā taṃ , āvuso sāriputta , āmantetī ’’’ ti .

‘‘ Evaṃ , bhante ’’ ti kho so bhikkhu bhagavato paṭissutvā yenāyasmā sāriputto tenupasaṅkami ;

upasaṅkamitvā āyasmantaṃ sāriputtaṃ etadavoca –

‘‘ satthā taṃ , āvuso sāriputta , āmantetī ’’ ti .

‘‘ Evamāvuso ’’ ti kho āyasmā sāriputto tassa bhikkhuno paccassosi .

Tena kho pana samayena āyasmā ca mahāmoggallāno [ mahāmoggalāno ( ka .)] āyasmā ca ānando avāpuraṇaṃ [ apāpuraṇaṃ ( syā . ka .)] ādāya vihāre āhiṇḍanti [ vihārena vihāraṃ anvāhiṇḍanti ( sī . pī .), vihāraṃ āhiṇḍanti ( syā .)]–

‘‘ abhikkamathāyasmanto , abhikkamathāyasmanto !

Idānāyasmā sāriputto bhagavato sammukhā sīhanādaṃ nadissatī ’’ ti .

Atha kho āyasmā sāriputto yena bhagavā tenupasaṅkami ;

upasaṅkamitvā bhagavantaṃ abhivādetvā ekamantaṃ nisīdi .

Ekamantaṃ nisinnaṃ kho āyasmantaṃ sāriputtaṃ bhagavā etadavoca –

‘‘ idha te , sāriputta , aññataro sabrahmacārī khīyanadhammaṃ āpanno –

‘ āyasmā maṃ , bhante , sāriputto āsajjaT4.388 appaṭinissajjacārikaṃ pakkanto ’’’ ti .

‘‘ YassaV3.191 nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , pathaviyaṃ sucimpi nikkhipanti asucimpi nikkhipanti gūthagatampi nikkhipanti muttagatampi nikkhipanti kheḷagatampi nikkhipanti pubbagatampi nikkhipanti lohitagatampi nikkhipanti , na ca tena pathavī aṭṭīyati vā harāyati vā jigucchati vā ;

evamevaṃP4.375 kho ahaṃ , bhante , pathavīsamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , āpasmiṃ sucimpi dhovanti asucimpi dhovanti gūthagatampi … muttagatampi … kheḷagatampi … pubbagatampi … lohitagatampi dhovanti , na ca tena āpo aṭṭīyati vā harāyati vā jigucchati vā ;

evamevaṃ kho ahaṃ , bhante , āposamena cetasā viharāmi vipulena mahaggatena appamāṇenaM3.182 averena abyāpajjena .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , tejo sucimpi ḍahati asucimpi ḍahati gūthagatampi … muttagatampi … kheḷagatampi … pubbagatampi … lohitagatampi ḍahati , na ca tena tejo aṭṭīyati vā harāyati vā jigucchati vā ;

evamevaṃ kho ahaṃT4.389 , bhante , tejosamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , vāyo sucimpi upavāyati asucimpi upavāyati gūthagatampi … muttagatampi … kheḷagatampi … pubbagatampi … lohitagatampi upavāyati , na ca tena vāyo aṭṭīyati vā harāyati vā jigucchati vā ;

evamevaṃ kho ahaṃ , bhante , vāyosamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsatiV3.192 anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ SeyyathāpiP4.376 , bhante , rajoharaṇaṃ sucimpi puñchati asucimpi puñchati gūthagatampi … muttagatampi … kheḷagatampi … pubbagatampi … lohitagatampi puñchati , na ca tena rajoharaṇaṃ aṭṭīyati vā harāyati vā jigucchati vā ;

evamevaṃ kho ahaṃ , bhante , rajoharaṇasamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , caṇḍālakumārako vā caṇḍālakumārikā vā kaḷopihattho nantakavāsī gāmaṃ vā nigamaṃ vā pavisanto nīcacittaṃyeva upaṭṭhapetvāT4.390 pavisati ;

evamevaṃ kho ahaṃ , bhante , caṇḍālakumārakacaṇḍālakumārikāsamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsatiM3.183 anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , usabho chinnavisāṇo sūrato sudanto suvinīto rathiyāya rathiyaṃ siṅghāṭakena siṅghāṭakaṃ anvāhiṇḍanto na kiñci hiṃsati pādena vā visāṇena vā ;

evamevaṃ kho ahaṃ , bhante , usabhachinnavisāṇasamena cetasā viharāmi vipulena mahaggatena appamāṇena averena abyāpajjena .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ Seyyathāpi , bhante , itthī vā puriso vā daharo yuvā maṇḍanakajātiko sīsaṃnhāto ahikuṇapena vā kukkurakuṇapenaP4.377 vā manussakuṇapena vā kaṇṭhe āsattena aṭṭīyeyya harāyeyya jiguccheyya ;

evamevaṃ kho ahaṃ , bhante , iminā pūtikāyena aṭṭīyāmi harāyāmi jigucchāmi .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyya .

‘‘ SeyyathāpiV3.193 , bhante , puriso medakathālikaṃ parihareyya chiddāvachiddaṃ uggharantaṃ paggharantaṃ ;

evamevaṃ kho ahaṃ , bhante , imaṃ kāyaṃ pariharāmi chiddāvachiddaṃT4.391 uggharantaṃ paggharantaṃ .

Yassa nūna , bhante , kāye kāyagatāsati anupaṭṭhitā assa , so idha aññataraṃ sabrahmacāriṃ āsajja appaṭinissajja cārikaṃ pakkameyyā ’’ ti .

Atha kho so bhikkhu uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavoca –

‘‘ accayo maṃ , bhante , accagamā yathābālaṃ yathāmūḷhaṃ yathāakusalaṃ , yo ahaṃ āyasmantaṃ sāriputtaṃ asatā tucchā musā abhūtena abbhācikkhiṃ .

Tassa me , bhante , bhagavā accayaṃ accayato paṭiggaṇhatu āyatiṃ saṃvarāyā ’’ ti .

‘‘ Taggha taṃ [ tvaṃ ( sī . pī .)], bhikkhu , accayo accagamā yathābālaṃ yathāmūḷhaṃ yathāakusalaṃ , yo tvaṃ sāriputtaṃ asatā tucchā musā abhūtena abbhācikkhi .

Yato ca kho tvaṃ , bhikkhu , accayaṃ accayato disvā yathādhammaṃM3.184 paṭikarosi , taṃ te mayaṃ paṭiggaṇhāma .

Vuḍḍhihesā , bhikkhu , ariyassa vinaye yo accayaṃ accayato disvā yathādhammaṃ paṭikaroti āyatiṃ saṃvaraṃ āpajjatī ’’ ti .

AthaP4.378 kho bhagavā āyasmantaṃ sāriputtaṃ āmantesi –

‘‘ khama , sāriputta , imassa moghapurisassa , purā tassa tattheva sattadhā muddhā phalatī ’’ ti [ phalissatīti ( ka . sī . syā . pī . ka .) aṭṭhakathāsu pana ‘‘ phalatīti ’’ itveva dissati ].

‘‘ Khamāmahaṃ , bhante , tassa āyasmato sace maṃ so āyasmā evamāha –

‘ khamatu ca me so āyasmā ’’’ ti .

Paṭhamaṃ .